Hinabang sa senior citizen sa Cebu City ipaagi sa bangko
CEBU, Philippines — Gimandoan ni Cebu City Mayor Edgardo Labella ang iyang mga personnel nga makig-alayon sa Land Bank of the Philippines kalabot sa pagpang-apod-apod unya sa financial assistance sa mga senior citizen sa siyudad.
Nakita nila nga kon ipadayon ang naandan nga anha sa sports complex ipanghatag ang hibanag pinansiyal maghuot gyud ang mga senior citizen ug ang social distancing dili matuman.
Giingong kombinsihon sa kagamhanan sa siyudad ang LBP kabahin sa maong katuyoan ug nanghinaot si Labella nga i-akumodar sa maong bangko ang ilang hangyo.
Ang siyudad aduna kini 80,000 ka senior citizen ug P2,000 matag-usa kanila ang ihatag nga hinabang pinansiyal sa siyudad alang sa buwan sa Marso ug Abril.
Gitinguha sa kagamhanan sa siyudad nga sunod semana mahatag na ang ayuda alang sa mga senior citizen. Lakip sa ihangyo sa siyudad ngadto sa LBP nga ang cash card mahimong magamit ngadto sa ubang mga bangko.
Ang distribution niini pinaagi sa mga department head ug makig-alayon sila sa barangay officials ug Department of Social Welfare and Services ug paubanan usab og polis.
Si Labella nagkanayon nga mahimong ang anak o kabanay sa senior citizen ang modawat sa cash card apan kinahanglan nga adunay authorization letter sa senior citizen ug naa kini sa lista.
“Let us be quiet liberal this time dili ta mag-istrikto kay karong panahona gikinahanglan gyud kaayo labi na kining daghang nawad-an sa panginabuhi”, dugang ni Labella. BDB (BANATNEWS)
- Latest
