CEBU, Philippines — Gidakop ang usa ka barangay kapitan sa lungsod sa Dumanjug human nga nagpatari atol sa selebrasyon sa iyang adlaw nga natawhan diha sa ilang lugar sa Barangay Kabatbatan sa maong lungsod.
Giila ang maong kapitan nga si Ruel Cuevas, 39, nagpuyo sa maong lugar ug gidakop sab ang kauban niini nga si Jerry Torres.
Matud ni Police Major Ardiolito Cabagnot hepe sa Dumanjug Police Station nga nakadawat sila og impormasyon nga adunay nahitabong patari sa maong barangay.
Ila kining gisusi ug nasayran nga mismo ang barangay kapitan sa maong barangay maoy nagpasiugda sa tari kay birthday diay niya anang adlawa ug kay mao kini iyang naandan.
Apan tungod sa estrikto nga pagpatuman sa pagdili sa pagsugal ilabi na sa mga kawani sa gobiyerno ug sa panahon nga giatubang karon sa publiko tungod sa COVID19 dali ra kaayong nasayran sa otoridad iyang gihimo.
Gibutyag sab ni Cabagnot nga posibli nga kompyansa ra sab si Cuevas nga dili ra mahibaw-an sa polis ang gibuhat tungod sa gilay-on sa ilang barangay gikan sa dalan.
Sumala pa ni Cabagnot, si Cuevas nga nagpatari tungod kay matud pa iyang adlaw nga natawhan.
Magatubang og kasong kalapasan sa Presidential Decree 1602 kun pagdili sa illegal nga sugal ug administratiba ang kapitan. /IBM (BANATNEWS)