CEBU, Philippines — Bag-ong regional director sa Police Regional Office 7 mopatuman sa gitawag og 3-strike policy sa tanang mga City ug Provincial Directors sa Central Visayas.
Kini maoy gibutyag ni PRO7 Regional Director Police Brigadier General Albert Ferro nga ang iyang palisiya nagpasabot nga kun adunay tulo ka chief of police sa usa ka lugar nga marelibohan tungod sa mga kalapasan tangtangon niya ang provincial o city police director sa tulo.
Dugang pa ni Ferro nga iyang isaad nga himuon niya ang PRO-7 nga maoy labing maayong police regional office lukop nasud ilabi na sa ilang mga programa nga ipatuman.
“We will always subscribe to the general policy of the Chief PNP. There is this number of strikes policy. If you are the provincial director and three of your police chiefs were removed, you will also be removed. We will be strict on that,” matud pa ni Ferro.
Gawas niini iya sab buhaton ang gibuhat ni kanhi Regional Director sa PRO7 ug kasamtangan RD sa National Capitol Regional Police Office (NCRPO) Police Major General Debold Sinas pagdili sa pagdula og golf sa oras sa tingtrabaho o kung mahimo likayan nalang sab niini.
Misaad sab si Ferro nga dili siya modawat og bisag unsa gikan sa illegal gambling ilabi na sa illegal nga drugas nga mao sab ang kusganong pahimangno ug gidili ni Chief PNP Police Director General Archie Gamboa. “I’ll go with the general directive of the Chief PNP (Philippine National Police) which is the no-take policy. I will declare that on my watch, there will be no take for all illegal activities, gambling or other unscrupulous activities in the region,” pasalig pa ni Ferro.
Gawas sa illegal nga drugas, sugal, pagdula sa golf nipahimangno sab si Ferro ngadto sa tanan nga polis sa Central Visayas nga dili mosulod og mga casino ug pagsulod sa mga balay kahilayan.
Tinguha ni Ferro niini mao ang paghimu sa bag-ong imahe sa kapolisan o pagpatuman sa internal cleansing sa organisasyon nga matud niya kinahanglang tutokan kay matud niya taas na nga panahon gihimong sumsuman sa estorya ang kabati sa imahe sa kapolisan.
Milingkod si Ferro sa iyang katungdanan kagahapon bisan pa man nga wala pa ang formal turnover of command nga mahitabo pa karong Martes sa sunod semana hulip kang Police Brigadier General Valeriano de Leon.
Iyang gipasalamatan si Gamboa ug si Presidente Rodrigo Duterte nga misalig sa iyang kapasidad nga gihatagan siyag higayon nga mangulo sa kapulisan sa Central Visayas. /IBM (BANATNEWS)