Socialized housing tukoron alang sa nasunogan

CEBU, Philippines – Makabaton na unya og kuagalingon ug permamente  nga kapuy-an ang mga biktima sa sunog  diha sa Sitio  Maharlika,  Barangay  Tipolo, Dakbayan sa Mandaue  sa  higayon nga mahuman ang kaugmaran sa tukoron nga socialized housing  nga condo type.

Kini ang gipadayag ni Mandaue City Engineer Andres Suson  atol sa press conference nga gipahigayon niadtong niaging  adlaw.

Matud  ni Suson nga giplano  na karon sa administrasyon ni Mayor Jonas  Cortes   ang katukoran  sa medium rise condominium type  ug gikatakda sa sunod buwan niining tuiga ipahigayon ang ground breaking ceremony sa maong proyekto.

Gitataw ni  Suson nga  ang buhatan   sa National  Housing Authority maoy naggahin  sa P600 milyones nga pundo alang sa katukoran  sa maong housing unit.

Matud usab ni Suson nga ang maong medium rise socialized housing ang puy-an unya sa 204 ka pamilya nga giilang mga tag-iya sa nasunog nga mga balay.  Nunot niini, giklaro ni Suson nga dili demolish ang gihimo sa kagamhanan sa dakbayan apan clearing operation ang gihimo diha sa Cebu International Convention Center (CICC) nga gihimo nga temporaryo nga puy-anan sa mga biktima sa sunog sa taudtaud na nga panahon.

Si Atty.  Edo  Ybañez,  executive secretary  sa mayor nibutyag nga ang cash  incentive  nga gihatag sa  niaging tuig ngadto sa mga biktima sa sunog alang unta kadto nga magamit nila sa pagpangita og mga panimalay nga ilang kaabangan.

Dugang ni Ybañez nga naabunohan  na ang luna nga patukoran sa socialized housing building apan  sanglit  pribado  man ang kabahin sa maong luna gihimo karon  sa kagamhanan ang paghapsay  sa dili pa sugdan ang kaugmaran. /BDB (BANAT NEWS)