CEBU, Philippines — Giumol sa Police Regional Office 7 ang pundok sa kabatan-onan pinaagi sa programa nga Kabataan Kontra Drogas ug Terorismo sa Central Visayas.
Kini aron moabag sa kapolisan sa pagsulbad sa problema sa ilegal nga drugas ug terorismo.
Matud ni Police Lieutenant Colonel Jeffrey Caballes, hepe sa Regional Community Affairs and Development Division sa PRO-7 nga boluntaryo ang gihimo sa mga batan-on aron mosuporta sa kampanya sa gobiyerno.
Gitigum sa kapolisan ang tanang chairman sa Sangguniang Kabataan sa Central Visayas ug nagpahigayon og eleksyon kinsa ang gipili mao ang SK Federation president sa Dakbayan sa Sugbo nga si Jessica Resch.
Matud ni Resch nga daku og papel ang kabatan-onan ilabi na sa pagsulbad sa problema sa ilegal nga drugas sa tibuok nasud. Isip presidente sa KKDAT aduna siyay plano nga programa nga isugyot ngadto sa PRO-7.
Plano ni Resch nga magpahigayon og dialogue uban ang mga student leaders kalabot sa militarization sa mga tunghaan. Tinguha sa maong kalihukan mao ang pag-establisar sa mga young leaders nga motabang sa pagprotektar sa kabatan-onan batok sa ilegal nga drugas ug pagkontra sa dili maayo nga impormasyon sa mga rebelde. /GMR (BANATNEWS)