Patay’ng lawas nga dunay taptap sa mata napalgan

CEBU, Philippines – Usa ka wala mailhing lalaki ang napalgang patay kagahapon sa buntag diha sa Sitio Upper Centro, Barangay Pit-os, Dakbayan sa Sugbo.

Ang biktima aduna kini taptap sa iyang mga mata ug mga samad pinusilan sa nagkadaiyang parti sa lawas.

Ang hepe sa Talamban Police Station Police Captain Joven Bethoveen Taneo nagkanayon nga nakadawat sila og report gikan sa barangay kalabot sa usa ka lalaki nga gipusil diha sa lugar.

Giingong ang residente diha duol sa lugar ang ni-report usab ngadto sa barangay human sila nakabati og mga buto sa armas.

Ang mga residente sa lugar wala dayon mogawas sa ilang  mga balay tungod sa kahadlok ug kangitngit pa sa palibot.

Pagkabuntag dihang gisusi na sa mga residente ang lugar maoy ilang nakita ang nahisgutang lalaki nga nagbuy-od nga adunay taptap ang mga mata ug adunay mga samad pinusilan ang nagkadaiyang parti sa lawas niini.

Nagpatabang ang kapolisan sa mga barangay tanod apan walay nakaila sa biktima kinsa adunay patik nga kasingkasing nga dunay dahon sa walang bukton niini.

Ang biktima nagsul-ob lang kini og short pants nga adunay kombinasyon nga maroon ug itom ang kolor ug walay sinena sa ibabaw’ng bahin sa lawas. – Sheriza Mae Uy/BDB

Abo sa Taal dili moabot sa Central Visayas–PHIVOLCS

Ang Philippine Institute of Volcanology and Seismology (PHIVOLCS)-Cebu nagkayon nga layo ra ang posibilidad nga moabot dinhi sa Central Visayas ang abo nga gibuga sa Bulkang Taal. Ang officer-in-charge sa PHIVOLCS Robinsons Jorgio niawhag sa katawhan nga dili angayang mabalaka tungod kay layo ra ang Central Visayas sa Batangas diin nahimutang ang Bulkang Taal.

Matud ni Jorgio ang active nga bulkan nga duol sa Central Visayas mao ang Kanlaon Volcano.

Padayon ang pag-monitor sa PHIVOLCS niini diin daghan sila og instrumento nga giinstolar sa palibot sa Kanlaon Volcano.

Si Jorgio nagkanayon nga layo usab ang posibilidad nga tungod kay nibuto ang Bulkang Taal mobuto usab ang Bulkang Kanlaon.

Gipaniguro ni Jorgio ngadto sa katawhan nga wala’y angay ikabalaka ug likayan ang pag-share og mga fake nga mga impormasyon ug kadtong mga impormasyon lang nga ihatag o kaha ipagawas sa PHIVOLCS ug authorized agency labot sa paglihok sa mga bulkan ug fault system ang basahon ug tan-awon. /BDB (BANAT NEWS)