CEBU, Philippines – Gidili ang mga balloon sa sulod ug gawas nga bahin sa Basilica Minore del Sto aron sa paglikay sa posibleng paghatag niini og risgo sa katawhan ug sa kalikupan.
Matud ni Allen Saga, pangulo sa security and safety sa Basilica nga siyento porsyento na nilang naplantsa ang sulod ug gawas nga bahin sa simbahan may kalabutan sa seguridad uban ang pagpakig-alayon sa kapolisan ug implementasyon nalang ang ilang gipaabot niini atol na sa pagsugod sa nobenaryo ug kapistahan.
Dugang pa ni Saga nga subli na usab nila karon nga gipahibawo ang pagdili sa mga balloon sulod sa 100-meter radius gikan sa simbahan ug sa palibot niini.
Giawhag sab sa kadagkuan sa simbahan ang mga deboto nga likayan nga mag-selfie panahon sa Santos nga Misa aron dili kini makabalda sa mga manimbahay ilabi na sa mga nangamuyo.
Gihangyo ni Saga ang katawhan ilabi na sa mga mahiligon sa selfie nga dili lang usab sila malain sa higayon nga matawag ang ilang atensyon ug sabton lang usab ang mga hugot nga pagpatuman sa seguridad sa simbahan.
Ang mga manimbahay giawhag usab nga dili himoon ang ilang kaugalingon nga mahimong subject sa mga badlungon sa katilingban hinungdan nga gidasig sila nga dili lang mag-alahas ug daghan ug dili usab magdala og dagkung kantidad sa kwarta.
Samtang ang LCT Teofilo Camomot maoy official carrier karong tuiga sa Balaang Bata Señor Sto. Niño ug Our Lady of Guadalupe atol unya sa fluvial procession sa Enero 18.
Ang LCT Teofilo Camomot usa ka cargo vessels nga magbiyahian sa Cebu-Bohol.
Matud ni Raphael Wong, ang corporate secretary sa Mandaue Shipping and Lighterage Corporation, nga tungod sa ilang tinguha sa pagtabang sa simbahan ug pagkadeboto sa Balaan nga Bata nagpadala sila og sulat sa simbahan sa ilang intensiyon nga ang LCT maoy mahimong sakyan sa mga imahen.
Sumala pa ni Wong nga mahinangpon ug malipayon sila nga nahatagan ug pagtugot nga mahimong carrier sa fluvial procession ang LCT human sa gipahigayon nga ocular inspection sa kadagkuan sa simbahan.
Sa pagkakaron padayon pa nga naglawig ang LCT Teofilo Camomot kay padayon pa man silang nagpaabot sa schedule alang sa ipahigayon nga dry-run sa rota alang sa fluvial procession. Gitug-an ni Wong nga ang maong barko napalit nila dul-an pa lang sa usa ka tuig apan nahimo kini niadtong tuig 1997.
Samtang si Fr. Ric Anthony Reyes, tigpamaba sa Basilica Minore Del Santo Niño, nga ang fluvial procession karong tuiga adto manukad sa Naval Forces Central Visayas wharf tungod kay dili man kini makadunggo kung adto sa Muelle Osmeña sama sa niaging tuig.
Ang makasakay sa LCT Teofilo Camomot mao ang kaparian sa Basilica. /GMR (BANAT NEWS)