14 departamento gamay ra’g gipangayong pundo

CEBU, Philippines — Dili moubos sa 14 ka departamento sa Kapitolyo ang gipagamyan ang pundo alang sa tuig 2020 base sa ilang gipangayo diha sa Sangguniang Panlalawigan.

Apil sa gamay ra og gipangayo nga pundo sa sunod tuig ang Cebu Provincial Detention and Rehabilitation Center (CPDRC) nga gikan sa P139 milyones karong tuiga, nahimo na lang P77 milyones kay matud pa sa warden nga si Reynaldo Valmoria gamay nalang ang ilang mga piniriso.

Ang Provincial Environment and Natural Resources Office (PENRO) nga adunay P33 milyones nga pundo sa tuig 2019, nangayo na lang kini og P26 milyones sa tuig 2020; ang Administrator’s Office gikan sa P119 milyones karong tuiga nahimo na lang nga P30 milyones; ang Provincial Planning and Development Office gikan sa P36 milyones nahimo na lang nga P29 milyones; ang Information Office, P25 milyones ang gipangayo sunod tuig gikan  sa P37 milyones niini karon.

Ang Provincial Health Office, P633 milyones karong tuiga P620 milyones nalang sunod tuig; ang Agriculture’s Office gikan sa P110 milyones sunod tuig P65 milyones nalang; ang Engineering’ Office gikan sa P240 milyones nahimo na lang nga P83 milyones; ang Cooperative Office P2 milyones na lang ang gipangayo sunod tuig itandi sa P9 milyones karong tuiga ug ang CSBT gikan sa P56 milyones karong tuiga, P48 milyones na lang sunod tuig.

Hasta ang buhatan sa Treasurer, Assessor, Legal ug Information and Communication Technology Office, gamay nalang sab og gipangayo.

Samtang siyam ra ka buhatan ang nisaka ang budget, apil na niini ang buhatan sa gobernador gikan sa P1.7 bilyon karong tuiga, nisaka kini og P7.9 bilyones sa tuig 2020.

Ang buhatan sa bise gobernador gikan sa P73 milyones karong tuiga, nitaas usab ngadto sa P144 milyones sa tuig 2020. (/IBM)(BANATNEWS)