CEBU, Philippines – Giaprobahan sa Cebu City Development Council ang Annual Investment Program (AIP) 2020 budget nga nagkantidad og P15 bilyones niadtong Miyerkules.
Matud ni Konsehal Raymond Alvin Garcia nga ang lakip niini ang mga prayoridad ni Mayor Edgardo Labella sama sa trapiko, edukasyon, pabalay, ug modernisasyon sa Carbon Public Market, ug uban pa.
Alang sa pag-upgrade sa sistema sa trapiko sa siyudad, aduna nay pasiunang P250 milyones gikan sa P3.8 bilyones nga supplemental budget karong tuiga.
Ang siyudad nagtinguha nga magtukod og duha o tulo ka medium rise building alang sa housing program alang sa mga squatters nga anaa sa daplin sa kasapaan ug kadtong mga apektado sa demolisyon.
Sa bahin sa edukasyon, gihimo na ang usa ka ordinansa alang sa pagtukod og Cebu City College (CCC). Sa tukuron nga Ramos Public Market, gipasalig ni Garcia nga hatagan og relocation site ang mga tindera sa merkado.
Sa Carbon Public Market, gigahinan kini og pundo alang sa pag-ayo sa Unit 2 ug 3.
Ang mayor mopili gikan sa AIP kung unsa ang ilakip sa annual budget nga paaprobahan sa konseho sa siyudad. (/GMR)(BANAT NEWS)