10 Chinese tourist naaberya sa dagat

CEBU, Philippines — Napulo ka Chinese nationals ang na-rescue sa Philippine Coast Guard-7 human ang ilang gisakyan nga motorbanca sa Go Deep Diving and Tours napagngan og makina samtang naglawig sa kadagatan sa Balicasag Island, Panglao Probinsiya sa Bohol.

Gibutyag sa tigpamaba sa PCG-7 Lt. Junior Grade Michael Encina nga pasado alas 7 niadtong Huwebes sa gabii nakadawat og distress call ang Coast Guard Balicasag uban sa Coast Guard Panglao nga daling girespondehan sa duha ka Coast Guard Sub-Stations.

 Ang mga na-rescue mao sila si Bella Liu,35; Zhou Cian, 36; Lu Yin. 36; Li Xeng Ji, 33 ; Zhang Qian, 33;Liu Yu, 36; Wu Si Liang, 30; Sui Yu Cing, 28; Cai Chung, 35; ug Ke Wei – 35.  Ang kapitan sa maong motorbanca mao si Anthony Lariosa.

Ang maong motorbanca naglutaw 7 nautical miles sa Balicasag ug dali kining gidala sa pantalan sa Panglao.

“In addition, through our ICARE Plan yung intensified community assistance awareness response and enforcement yun pong ating operasyon ay hindi inabot ng isang oras, the moment na tumawag yung concerned citizen, the distress call up to the operation itself naihatid natin sila dun sa Panglao mismo yung sampung Chinese Nationals is inabot lang ng almost 45 minutes nakita agad natin sila. Isa din ito sa mga gusto naming iparating na ang Coast Guard Central Visayas ay may tinatawag na 10:30 response time, ano po ibig sabihin nun ‘yun pong 10 minutes rule na dapat yung rescue team naka-depart na at 30 minutes rule na dapat yung mga floating assets natin is nakaalis na kaya po sinusunod natin yun because that is one of our protocol here in Central Visayas,” asoy ni Encina.

Matod ni Encina ang maong motorbanca gikan sa Panglao ug miadto sa Sumilon Island sa Lungsod sa Oslob, padulong na unta kini mobalik sa Panglao dihang napagngan og makina.

Apan nakita nga ang rehistro sa maong motorbanca kutob ra sa Panglao ang destinasyon ug giingong wala kini nagpa-clear sa Coast Guard sa ilang pagbiya paingon sa Sumilon ug Sumilon pabalik sa Panglao.

Tungod niini, gi-impound sa Coast Guard Station Bohol ang maong motorbanca pasakaan og reklamo ngadto sa Maritime Industry Authority-7 aron matangtangan og prangkisa.

Panawagan ni Encina sa mga motorbanca operators nga motuman sa safety and security rules and regulations ilabi na kun nagkarga og pasahero ug kinahanglang magpa-clear sila aron masusi ang barko o mga banca ni-comply sa safety requirements ayha pa molawig. (/IBM)(BANATNEWS)