CEBU, Philippines — Magtutudlo kinsa gitumbok nga maoy hinungdan nganong nagpakamatay ang usa ka tinun-an didto sa Poro niadtong Agosto 8 gitun-ang pasakaan og kaso sa kapolisan tungod sa matud pa pagsugo niini sa maong bata pagmaneho og motorsiklo bisag walay lisensya.
Ang maong magtutudlo sa Grade 9 diha sa Luciano B. Rama Senior Memorial National High School sa Barangay Esperanza sa maong lungsod.
Matud pa gisugo niini ang 15 anyos pagpa-refill og mineral water sa ilang container ug gipamaneho kini og motor bisan og wala kini lisensya nga makamaneho.
Si Police Master Sergeant Adorberto Carba, sa Poro Police Station, nagkanayon nga posibleng mapasakaan nila og kasong paglapas sa Presidential Decree 603 o ang Child and Youth Welfare Code.
Sa article 53 (11) sa maong balaod kini nagkanayon nga kun masakpan ang minor de edad nga nagmaneho og motorsiklo o sakyanan, kini nagpasabot nga aduna kini permiso sa tagiya.
Sa kaso sa maong bata, giingong gisugo kini sa iyang magtutudlo magpa-refill og ilimnong tubig ug gitugotan nga magmaneho og motorsiklo.
Matud pa nga kini nga kaso ra ang maigo nila sa maestra sanglit dili nila kini mapasakaan og kaso subay sa pagpakamatay sa bata.
Sa imbestigasyon sa kapolisan, matud pa ni Carba nga adunay angkas nga classmate ang maong tinun-an nga maoy nagkupot sa galloon, apan tungod kay bug-at, na outbalance ang motor ug nagaras ang motorsiklo sa maong magtutudlo ug nakaigo sab sila og laing duha ka mga motorsiklo.
Giingong gikasab-an sa magtutudlo atubangan sa klase ang bata ug giingnan nga pabayon og P3,700 nga danyos. Sa paguli sa bata sa ilaha nabantayan kini sa apohan nga masulob-on.
“Paguli kuno niingon kuno nga ‘ulawa ani ugma oy,” sigun sa maong polis.
Samtang naglung-ag og panihapon ang lola, giingong nakit-an pa niya ang bata nga miadto sa bakanteng luna duol sa ilaha ug nagdala og pisi.
Apan sa dihang ting panihapon na, napalgan na lang nga nagbitay na kini gikan sa usa ka kahoy ug wala nay kinabuhi.
Sa pagkakaron, nangalap pa ang kapolisan og dugang mga ebidensya ug testimonya subay sa maong kaso. (/IBM)(BANATNEWS)