Pag-ayo sa taytayan sa Mananga di pa mahuman

CEBU, Philippines – Lain na sab nga kapakyasan sa pasalig ang mahitabo human dili pa gyud mahuman ang pagpalig-on sa taytayan sa Mananga sa Tabunok, Dakbayan sa Talisay.

Kini human niangkon ang kontraktor nga dili pa nila mahuman karong Agosto 4 base sa ilang pasalig ngadto ni Mayor Gerald Anthony “Samsam” Gull as Jr.

Si Gullas niingon nga ang kontraktor nangayo og laing duha ka semana aron ila gyud mahuman ang proyekto. Wala makatago ang mayor sa iyang kasagmuyo tungod kay iyang gipanglantawan nga grabeng trapik unya ang mahitabo ilabi na sa adlaw nga ipahigayon ang Ironman karong Agosto 11.

Hinoon nakabentaha lang kay mahimo ra nga magamit ang usa ka lane niini nga paingon sa Siyudad sa Sugbo.

Si Jonathan “Joy” Tumulak, traffic czar sa siyudad, nibutyag nga iyang gipakig-estoryahan si Engr. Jun Dela Cruz, head sa maintenance sa DPWH 1st District Engineering Office, kalabot niini.

Pakigkitaan ni Dela Cruz ang kontraktor aron madugangan ang ilang trabahante nga mapadali ang trabaho. (/GMR)(BANAT NEWS)