CEBU, Philippines — Gipahibawo ni Gobernador Gwendolyn Garcia ang mga barangay kapitan sa Lalawigan sa Sugbo kung unsa ang iyang mga prayoridad sa iyang administrasyon.
Kini atol sa gipahigayun nga labing unang general assembly sa mga barangay kapitan sa administrasyon ni Garcia nga gipahigayon sa IEC Convention Center (IC3) sa Mabolo, Dakbayan sa Sugbo.
Gawas ni Garcia, nitambong sab sa kalihukan sila si Bise Gobernador Hilario Davide III, Kongresista Pablo John Garcia ug Federation of Associations of Barangay Councils president Celestino “Tining” Martinez III.
Gipahibawo ni Garcia nga mohatag siya og tag P50,000 matag tuig alang sa socio-cultural and sports samtang ang mga proyekto naglangkub sa mga rehabilitasyon sa mga barangay hall, day-care ug health center, pagsemento sa kadalanan, water system, electrification ug uban pa nga mas gikinahanglan sa matag barangay.
Hatagan sab og insurance ang mga barangay kagawad ug mga barangay tanod, health ug day-care workers ug animal health workers.
Ang cash incentives sa mga barangay health workers himoon na nga P4,000 gikan sa tag P2,500 matag tuig samtang ang tag P1,500 nga cash assistance sa mga barangay tanod himoong P3,000 nga ilang makuha sa unang semana sa Disyembre.
Apan giklaro ni Garcia nga iya gyud unahon ang mga barangay nga mas nagkinahanglan pinagi sa pagduso og resolusyon, program of works ug liquidations sulod sa 60 ka adlaw human sa pag-implementar sa proyekto.
“Dili nako matubag ang tanan ninyong panginahanglan apan paningkamutan gyud nako labi na katong mas nagkinahanglan,” matud ni Garcia. (Beverly I. Manla, CNU Intern/GMR)
Mga dalan sirad-an sa Ironman
Gipahibalo sa buhatan sa City Traffic Management System (CTMS) sa Dakbayan sa Lapu-Lapu ang ilang gikatakdang pagsirado sa dagkung dalan ilabi sa nagpaingon sa Mactan-Cebu International Airport sa Agosto 11.
Sa maong adlaw ipahigayon ang International Triathlon Ironman 70.3 subay sa dalan sa Barangay Punta Engaño, Mactan, Buaya, Ibo ug Pusok ingon man bahin sa ML Quezon Highway hangtud sa eskina sa Marcelo Fernan Bridge.
Si Mario Napuli, hepe sa CTMS, niingon nga ang pagsirado magsugod alas 4 sa kaadlawon hangtud mahuman ang lumba.
Nunot niini si Napuli nag-awhag sa mga guests sa mga hotels nga maapektohan ang ilang mga lakaw sa paggawas og sayo sa dili pa ang pagsirado sa mga dalan. (/GMR)(BANATNEWS)