CEBU, Philippines – Dili mominus duha ka sukaranan ang nakita sa kampo ni Gobernador Gwendolyn Garcia sa tinguha nga pag-blacklist sa WT Construction, Inc.
Kini human walay aksyon nga gihimo ang kontraktor sa suwat sa Kapitolyo nga pabunbonan pagbalik ang kinawtan niini sa tukuran unta sa 20-storey resource center.
Matud ni Atty. Marino Martinquilla, legal consultant ni Garcia, nga unang ground mao ang bidding document nga giduso sa WTCI. Giingong sila ang “largest single contract” sa pagtukod sa Cebu International Convention Center apan nasuta nga dili mominus tulo diay ka kontrata ang gisudlan sa kontraktor sa maong proyekto.
“Dili tinuod nga sila ang single contract. That’s falsification of bidding document,” matud ni Martinquilla.
Laing ground mao ang pagguba sa Commission on Audit building nga unta ang karaang BaEx building ra ang ilang gub-on sa tukuran sa resource center. Si Martinquilla nagkanayon nga padayon pa ang ilang pag-ukay sa mga dokumento nga giduso sa WTCI. Una na nga nihulga si Garcia sa WTCI nga i-blacklist sila kun dili motuman sa mando nga ibalik sa level ground ang nakawtan na nga site sa resource center.
Ang usa ka kompaniya nga ma-blacklist dili na kini kaapil sa bisan unsa nga bidding activity nga himoon sa gobiyerno. (/GMR)(BANAT NEWS)