CEBU, Philippines – Pipila sa mga department heads sa Kapitolyo ang gi-reassign ni Gobernador Gwendolyn Garcia ngadto sa laing buhatan samtang ang uban gi-detail sa pipila ka mga lungsod.
Base sa Memorandum of Reassignment No. 3 -2019 ug Memorandum of Designation No. 1- 2019 nga giluwatan ni Garcia niadtong Hulyo 3, 2019, ang local risk reduction officer II nga si Wilson Ramos maoy kasamtangang gihimo nga officer in charge sa Provincial Social Welfare and Development Office (PSWDO) samtang ang hepe sa maong buhatan nga si Marivic Garces gi-reassign ngadto sa Provincial Disaster Risk Reduction and Management Office (PDRRMO).
Si Ramos nagsugod kini og lingkod niadtong Hulyo 4.
Ang hepe sa Provincial General Services Office (PGSO) nga si Jone Siegfred Sepe gi-detail ngadto sa Lungsod sa Barili.
Ang provincial agriculturist nga si Roldan Saragena gi-detail sa Lungsod sa Pinamungajan.
Matud ni Garcia nga nanginahanglan og expertise ni Saragena ang pagpalambo pa sa fishpond sa probinsya didto sa maong lungsod.
Ang OIC karon sa Provincial Agriculture Office mao ang aquaculturist II nga si Aylen Cielo. Ang provincial assessor nga si Alma Sibonga gi-reassign sa ITax Office ug gihimong OIC sa assessor’s office si Mariflor Vero.
Matud ni Garcia nga walay time frame hangtud kanus-a magpabilin sa ilang bag-ong assignments ang mga department heads. (/BDB)(BANAT NEWS)