CEBU, Philippines – Nipahinumdum ang Commission on Elections (Comelec) ngadto sa mga politiko nga dili mamahimo nga ilang itudlo sa pangatungdanan sa gobyerno ang mga napildi niini nga kauban atol sa piniliay.
"Katong napildi sa election dili na pwede nga iappoint nimo within one year gikan sa pagkapildi.... Ang rason ana kay ang Constitution paglikay bitaw sa appointment of political lame duck" asoy ni Atty. Ferdinand Gujilde ang provincial election officer.
Dugang niini nga dili mamahimo nga matuis ang balaud ug ang makalapas niini mamahimong manubag ngadto sa Civil Service Commission.
Matud ni Gujilde nga mamahimo ra hinuon nga makuha isip personal consultant sa mga opisyales sa gobyerno sanglit wala may employer-employee relationship. Apan kinahanglan ang maong consultant dili magdawat og sweldo gikan sa gobyerno.
Ang Section 6 Article IX-B sa 1987 Constitution nagsaysay nga walay kandidato nga napildi sa eleksyon ang ma-appoint sa bisag unsa nga posisyon sa gobyerno.
"No candidate who has lost in any election, within one year after such election, be appointed to any office in the Government or any government- owned or controlled corporation or in any of its subsidiaries" pagbasa sa balaud. (/DILT)(BANAT NEWS)