CEBU, Philippines — Ang maisugon nga director sa Cebu City Police Office nga si Police Colonel Royina Garma gikatahong moretiro na sa serbisyo apan gikatahong maoy mamuno sa usa sa labing kwartahang ahensya sa gobiyerno.
Apan sa pakighinabi sa Banat News kang Garma, wala niya gikompirmar apan wala sab niya gihimakak ang maong report nga mag- early retirement siya aron mamuno sa laing ahensya sa gobiyerno.
Giangkon hinuon niya nga gi-appoint siya sa mas taas nga posisyon sa gobiyerno ug wala pa sab migawas ang pormal nga dokumento kabahin sa maong bag-ong pwesto.
Tak-om usab si Garma kun unsa kini nga posisyon apan matud pa ni Cebu City Advisory Council Chairman ug Incumbent Cebu City Councilor Joel Garganera, si Garma giingong maoy himuong General Manager sa Philippine Charity Sweepstakes Office (PCSO).
“I paid a visit this morning to our CCPO Police Dir. Royina Garma, in 2 weeks’ time it will be a courtesy call to the Head Office of the General Manager of the Philippine Charity Sweepstakes Office (PCSO). Abangan!” sigun pa sa maong social media post.
Samtang ang direktor sa Police Regional Office-7 nga si Police Brigadier General Debold Sinas nagkanayon nga wala pa silay nadawat nga order kun kinsa ang mopuli kang Garma pagka city director.
“Hopefully Colonel Garma will be assigned to higher office, kung kinsay mopuli, wala pay order,” sigun ni Sinas.
Si Garma mao ang pinakaunang babayeng direktor sa CCPO sa dihang milingkod siya niadtong Hulyo 2018.
Siya maoy mipuli kang Police Colonel Joel Doria pagkahuman sa duha ka tuig niini isip direktor sa kapolisan sa Syudad sa Sugbo.
Di pa lang dugay milusad si Garma og programa sa pagsumpo sa illegal nga sugal sa siyudad. Kini mao ang ‘no usher zone’ diin target nga pangsikopon ang mga ushers sa mga Small Time Lottery (STL) nga giingong gipangbuhian na sa Sinsilyo Corporation human nadiskubrehang mo-remit sab sila sa mga bokis.
Ang bokis usa sab ka numbers game nga sugal apan illegal kini sukwahi sa STL ug sa Peryahan diin aduna silay pagtugot sa PCSO. Ang kita sa mga bokis adto mapunta sa mga pribadong illegal gambling lords. (/IBM)(BANATNEWS)