CEBU, Philippines – Sa 17 ka mga bokal nga naglangkub sa bag-ong Sangguniang Panlalawigan, siyam niini ang wala motambong sa gipatawag nga meeting ni Vice governor-elect Hilario Davide III niadtong Lunes, Hunyo 10, 2019.
Ang tigum alang unta sa pag-set sa in-house rules and procedures sa 15th Sangguniang Panlalawigan.
Matud ni provincial secretary Atty. Pulchra Marie Acevedo nga si bokal Yolanda Daan sa Unang Distrito, wala makatambong kay na-ospital si konsehal Julian Daan. Sa Segundo Distrito, ang reelectionist nga si Edsel Galeos, on-leave kini.
Sa Tersero Distrito, ang bag-ong bokal nga si John Ismael Borgonia wala makatambong kay dili siya bakante. Sa Kwatro Distrito, ang bag-ong bokal nga si Kerrie Shimura, nagbakasyon uban sa iyang pamilya.
Sa Kinto Distrito, ang bag-ong bokal nga si Red Duterte, wala motunga kay namatay ang iyang inahan.
Sa Sixto Distrito, si reelectionist Thadeo "Jonkie" Ouano walay kompirmasyon nga gipadala samtang ang bag-ong bokal nga si Glenn Soco, nagbakasyon sab.
Si 7th District reelectionist Christopher "Dong" Baricuatro, nagbakasyon samtang si Jerome Librando, nag-sick leave. Si Davide nakasabot sa mga rason sa mga bokal ug matud niini nga natural ra nga mamakasyon aron mo-relax human sa kampanya.
Ang nakatambong sa tigum mao sila si SK Federation president Jerico Rubio, PCL president Irving Gamallo, ABC president Celestino "Tining" Martinez, Raul Bacaltos, Jose Mari "Tata" Salvador, Horacio Franco, Miguel Magpale ug Victoria "Tata" Corominas-Toribio. Si Acevedo miingon nga nasabutan sa tigum nga isulat kon unsay sugyot sa mga bokal alang sa mga in-house rules ug isumiter kini sunod Lunes, Hunyo 17.
Dugang ni Acevedo, wala pa mahisgoti ang committee chairmanship ug malaumon siya nga inig Hunyo 19, atol sa laing tigom anaa na ang tanang bokal aron mahisgotan og tarong ang house rules. (/DILT)(BANAT NEWS)