CEBU, Philippines — Sa ikaduhang higayon giktaba na sab ang Integrated Bar of the Philippines Cebu City mayoralty candidates debate nga karon untang adlawa himuon gumikan kay dili makatambong si Bise Mayor Edgardo Labella.
Matod ni IBP-Cebu City Chapter President Regal Oliva nga bisan wala sila nakadawat og official letter or communication gikan ni Labella nga nanghangyong isibog lang una ang petsa sa debate, nisugot sila tungod kay si Cebu City Mayor Tomas Osmeña nisugot sab.
Si Osmeña ug Labella nga pareho kaniadtong magkaalyado sa Bando Osmeña Pundok Kauswagan (BOPK) magatbang sa pagkamayor sa siyudad karong Mayo 13 nga piniliay.
Ang IBP debate una untang himuon nidtong Abril 22 sa alas 9 a.m. sa Sinulog Ballroom, City Sports Club, apan wala mahinayon ug gisibog karong adlawa.
Si Labella gikatahong adunay importanteng lakaw ngadto sa Manila nga dili niya mahimong dili tungahon maong mihangyo kining isibog lang una ang petsa sa debate.
Si Labella sa iyang post sa Facebook nangayo og dispensa sa katawhan apan mipasalig siya nga dili siya moatras sa debate.
Ang IBP Debate gi-organisar sa IBP Cebu City Chapter aron makatabang nga giya sa katawhan ilabi na sa mga botante aron makapili og angayan nga mayor ug mga opisyales sa dakbayan.
Tungod sa kausaban gisibog ang debate karong Mayo 10. Gihangyo ni Oliva ang understanding sa publiko kabahin sa postponement.
“We anticipate the same support and enthusiasm to attend this activity as part of the political and democratic process of the right to suffrage,” matud ni Oliva.(/IBM)(BANATNEWS)