173 ka botante ipatangtang sa listahan
CEBU, Philippines – Si Cebu City Vice Mayor Edgardo Labella nagkanayon nga ang kaso labot sa 173 ka tawo nga gustong ipatangtang sa listahan sa registerd voters sa Barangay. Kamagayan anaa sa korte ug dili siya gusto nga tukion ang merito sa kaso. Kahinumduman nga tulo ka petitioners ang miawhag sa korte nga tangtangon ang 173 ka tawo sa listahan sa voters nga rehistrado sa Barangay Kamagayan human nasayran nga ang maong mga tawo nagpuyo sa Mandaue City.
Sila si Enriquita Crispe, Anita Telen ug Gina Umbao nangayo og intervention sa Municipal Trial Court in Cities Branch 1 ug 2 sa Siyudad sa Sugbo nga tangtangon ang maong mga botante sa listahan.
Nasayran nga ang maong mga botante unang namuyo sa Kamagayan apan nabalhin sa Brgy. Cubacob, Mandaue City human ang ilang kabalayan gi-demolish.
Gikataho nga ang 173 ka tawo mipaluyo sa kandidatura ni Labella sa umaabot nga piniliay.
Subay niini, si Cebu City North District Election Officer Atty. Marchel Sarno miingon nga sa ilang gihimong beripekasyon, rehistrado gyud nga botante sa Kamagayan ang maong mga tawo.
Bisan og anaa na sila nagpuyo sa Mandaue, mahimo gihapon silang makabotar sa Cebu City.
“As long as dili sila ma-delist entitled sila sa Cebu City as mao na ron gipa-exclude nila kay gusto nila dili ma-entitled. So, ug mosulti ang korte nga i-exclude niya, atong papason sa atong list of voters so dili na sila entitled to vote”, pasabot ni Sarno. (/DILT)(BANAT NEWS)
- Latest
