Magpataka og labay og hugaw sa tawo, silotan

CEBU, Philippines — Mapahamtangan na og silot ang bisan kinsa nga masakpan nga magpataka og labay sa hugaw sa tawo didto sa lungsod sa Sibonga.

Ang Sangguniang Bayan sa Sibonga nipasar kini sa balaodnon kalabot niini nga mao ang No. 10-2018-96 o gitawag nga “An Ordinance on Zero Open Defecation (ZOD).

“This Ordinance shall be applicable to all persons, natural or juridical, resident o non-resident within the territorial or jurisdiction of the Municipality of Sibonga,” sumala pa sa maong ordinansa.

Nakalatid sa maong balaod nga bawal ang paglibang sa bisan asa nga dapit didto sa maong lungsod; paglabay o pagbiya  sa mga fecal waste o hugaw sa tawo.

Kalapasan usab sa balaod ang mga panimalay nga walay pansayan nga gibutang.

Ang Barangay Sanitation Control System nga gilangkoban sa kapitan, midwife sa barangay, kagawad nga maoy nangulo sa committe on health ug barangay health worker maoy mopatuman sa Barangay Sanitation Program.

Apil sa himoon sa maong grupo ang pag patuman sa balaod ug pag silot sa mga makalapas niini. Ang makalapas makamulta og P500 ug kinahanglan mohimo sa community service sa barangay sa unang offense. Sa ikaduhang offense masilotan og P1,000 ug tulo ka adlaw nga community service ug sa ika tulo nga offense P2, 500 na ang silot katong mga wala makatukod og pansayan sulod sa unom ka bulan human nahatagan og notice.

Ang maong ordinansahon nagtinguha sa limpyo ug luwas nga “environment” sa lungsod sa Sibonga.

“To promote zero open defecation, to safeguard public health and well-being of all the constituents by allocating funds annually for sustainable sanitation program relative hereto,” pagbasa sa maong ordinansa nga gipangamahan ni konsehal Teofila Killian. —/LPM (BANATNEWS)