Mga menor nga magmotor maoy sagad madisgrasya

CEBU, Philippines — Miabot sa 100 kapin ug kulang ka mga kaso sa disgrasya ang natala sa Dakbayan sa Bogo niadtong miaging tuig ug sagad sa mga biktima mga batan-on. Butang nga gipaningkamotan sa kapulisan nga mokunhod kini karong tuiga.

Si Insp. Ramuel Banogon, deputy chief sa Bogo City Police Station nga nahinabi sa DYSS Super Radyo niingon nga menus sa ilaha ang mga krimen apan dunay daghang kaso sa disgrasya sa kadalanan.

Si Banogon nibutyag nga kasagaran  sa madisgrasya kining mga menor de edad nga gipasagdan lang sa ilang mga ginikanan nga magmaneho og motorsiklo.

“Numero uno, naka violate na sila sa balaud kay wala man silay lisensya. Ang mga ginikanan nga dili kabadlong sa ilang mga bata mahimo namo nga pasakaan og kaso,” nagkanayon si Banogon.

Tungod sa maong mga hitabo, doblehon na unya ug estriktuhon sa kapolisan sa lungsod ang pagpahigayon og police checkpoints nga diin ang mga polis pangayoan gyud og lisensya ang mga motoristang mag-motor.

Plano usab nila nga bisitahon ang mga tunghaan aron pahimangnoan ang mga kabataan pinaagi sa ilang mga magtutudlo nga dili magmaneho ilabi na kadtong walay mga lisensya.

Gawas pa niana, ilang tambagan ang mga ginikanan sa mga menor nga ilang masita nga pwede silang mapasakaan og kaso kun tugotan lang ang ilang mga anak nga magbahis-bahis sa kadalanan gamit ang motorsiklo.

Subay sa patakaran, ang Land Transportation Office nag-ingon kinahanglang dunay lisensya ang magmaneho og sakyanan o motorsiklo sa kadalanan.

Kadtong mga gustong magtuon magmaneho kinahanglang mokuha og student permit. Apan kung wala pay 18-anyos ang edad  kinahanglang magdala sila og original copy sa parental o guardian consent inubanan sa kopya ug original copy sa government IDs sa ilang ginikanan o guardians.

Kompletuhan sab nila ang Application form for Driver’s License (ADL); original ug kopya sa birth certificate nga na- authenticated sa National Statistics Office (NSO); medical certificate ug bayran ang mga kinahanglang bayrunon sa pagproseso sa permit.

Kun duna nay student permit dili gihapon sila mahimong makamaneho og sakyanan o motorsiklo kun wala silay kaubang drayber nga dunay balidong lisensya. (BANAT NEWS)