CEBU, Philippines — Labing mabulokon ang gipasiugdahan nga Silhig Festival 2019 sa Brgy. Paknaan sa Dakbayan sa Mandaue kagahapon sa hapon nga gibuksan pinaagi sa parada nga milibot sa kadalanan sa nahisgutang barangay.
Ang Silhig Festival sa Paknaan maoy nagsilbing halad sa ilang patron nga si Señor Sto. Niño sa tinuig niini nga pangilin ingon man pagpasigarbo sa ilang produkto nga silhig nga ginama sa lanot sa buli nga nahimo nilang panginabuhian sukad pa sa ilang katigulangan.
Si Kapitan Malaquias Soco miingon nga ang maong festival ilang gihimo isip pagsuporta sa kagamhanan alang sa pagpalambo sa pagpamuhat og silhig sanglit 15 porsiyento sa mga residente niini, ang pagpamuhat og silhig maoy nahimo nilang panginabuhi. (BANAT NEWS)