CEBU, Philippines – Si Cebu City councilor aspirant Ernesto Herrera II ug ang asawa niini nga si Vanessa, ang gipasakaan og kasong Qualified Theft ug Estafa sa kasosyo sa ilang negosyo didto sa Dakbayan sa Danao. Ang magtiayong Neil Richard ug Janice Kintanar kasosyo sa mga Herrera sa negosyong panaderya sulod sa upat ka tuig.
Apan niadtong Nobiyembre 2018, gitawag sila sa kompaniya ug gipahibalo nga sila adunay utang nga mokabat sa P800 mil ug adunay daghang bouncing check. Kini ang hinungdan sa ilang katingala.
Dugang nga pasangil ni Kintanar nga ilang nasayran nga ang kita nila sa maong negosyo gitago sa magtiayong Herrera kay wala man silay tukma nga income ug inventory sa ilang gisosyohan nga negosyo.
Gisuwayan niya og kontak ang mga Herrera ilabi na sa asawa niini nga matawag niyang suod nga higala aron tukion ang maong problema apan wala siya hatagi og pagtagad.
Matud nila niadtong Nobiyembre 2018 hangtud sa ilang pagpasaka og kaso, wala na sila makadawat og share sa ilang negosyo. Mao nga matud ni Janice, dili unta moabot sa punto legal kun gihatagan pa sila og pagtagad sa magtiayong Herrera.
Gipadayag sa babayeng Kintanar nga walay bulok politika ang pagpasaka nila og kaso kay personal kini ug subay kini sa ilang negosyo nga ilang gibuboan og puhonan.
Samtang si Neil Richard mitug-an nga importante unta kaayo niya ang panaghinigalaay kay sa kwarta apan wala man sila hatagi og gibug-aton sa mga Herrera hinungdan nga nangita sila og hustisya. Si Atty. James Allan Sayson, ang abogado sa mga complainant mitug-an nga basi sa ilang ebidensya, lig-on gyud kini ug adunay mga dokumento nga nagpamatuod nga kasosyo gyud ang duha ka habig.
Suway nga gikuhaan og pamahayag sa Banat News si Herrera, apan ang iyang gipatubag mao ang iyang abogado nga si Atty. Abraham Rey Acosta kinsa miingon nga mapasalamaton sila sa pagpasaka og kaso aron matubag sa tukma nga lugar ang mga pangangkon sa magtiayong Kintanar.
Matud ni Acosta nag-inusarang tag-iya sa maong negosyo si Herrera, sukwahi sa pangangkon sa mga Kintanar ug politika ang motibo sa kaso kay karon nga gipasaka nga nikandidato iyang kliyente.
Gani ila na usab gipasakaan og kasong cyber libel ang mga Kintanar tungod sa mga giluwatan nga pamahayag batok sa iyang kliyente. (/DILT)(BANAT NEWS)