Pagbaligya sa bidding documents gilugwayan

CEBU, Philippines — Gilugwayan sa Siyudad sa Sugbo ang pagbaligya sa bidding documents alang sa disposal sa tulo ka ektarya nga luna diha sa South Road Properties.

Kahinumduman nga niadtong Enero 22 ang deadline unta sa pagbaligya sa bidding documents apan gilugyawan kini hangtud sa Pebrero 7.

Ang public bidding sa maong luna ang giusab usab ang schedule gikan sa Enero 23 ngadto sa Pebrero 8.

Matud ni assistant city administrator for administration Veronica Morelos nga ang maong kausaban napahigayon tungod  sa hangyo sa mga interesadong kompaniya nga mopalit sa maong luna.

“The interested bidders requested for the extension to give them ample time to prepare, matud ni Morelos.

Sa pagkakaron, adunay duha ka kompaniya ang nakapalit na sa bidding documents diha sa Department of General Services Office ug adunay laing usa ka kompaniya nga wala pa makadesisyon kon modayon ba sa pag-apil sa bidding.

Ang bidding documents nagkantidad kini og P25,000 ug dili kini pweding ma-refund.

Ang tulo ka ektaryang luna dunay floor price nga P110,000 matag metro-kwadrado o P3.3 bilyones ang kinatibuk-an. Makita ang maong tulo ka ektaryang luna dinha duol sa boundary sa Cebu City ug Talisay City sa SRP.

“Allowed ra to extend sa deadline kay walay provision sa law. Mao man pod ang hangyo sa atong mga interested bidders ug naa pod ni blessing ni mayor ang extension”, padayag ni Morelos.

Human makapalit og bidding documents ang mga interesadong kompaniya mosumitir dayon kini sa ilang bid documents aron makita kon kinsa ang modaog sa bidding nga makapalit sa nahisgutang luna. (/BDB)(BANATNEWS)