Margot maoy top sa pagpasar og mga resolusyon

CEBU, Philippines — Nikabat ngadto sa 916 ka resolusyon ug 28 ka ordinansa ang napalabang sa konseho sa Dakbayan sa Sugbo sa niaging tuig.

Si Konsehala Margarita Osmeña maoy kinadaghanan og resolusyon nga napasar diin niabot ngadto sa 229 ang naaprobahan ug lima ka ordinansa.

Subay niini, sila si Konsehal Eduardo Rama, Jr. ug Erik Miguel Espina ang labing gamay nga napasar diin matag usa kanila tulo lang ka resolusyon ang napasar.

Si Konsehal Eugenio Gabuya, Jr. adunay 127 ka resolusyon gisundan ni Mary Ann de los Santos nga dunay 91 ka resolusyon; Jocelyn Pesquera, 87 ka resolusyon ug Sisinio Andales 82 ka resolusyon.

Samtang si Konsehal Jerry Guardo adunay 69 ka resolusyon; Raymond Alvin Garcia, 51 ka resolusyon; Alvin Arcilla, 39 ka resolusyon ug Joel Garganera nga adunay 37 ka resolusyon.

Si Konsehal David Tumulak adunay 36 ka resolusyhon; Joy Augustus Young adunay 30 ka resolusyon; Renato Osmeña, Jr.’ walo ka resolusyon; si ex-officio member Jessica Resch adunay pito ka resolusyon ug si Jose Daluz, III ug ex-officio member Franklyn Ong matag usa kanila adunay unom ka resolusyon ug si Konsehal Pastor Alcover, Jr. adunay lima ka resolusyon.

Sa mga ordinansa pareho sila si Osmeña ug Gabuya nga adunay lima matag usa kanila ug gisundan nilang Garganera, Tumulak, ug Andales nga adunay tulo ka ordinansa matag usa kanila.

Samtang si Young ug Pesquera adunay duha matag usa kanila samtang sila si Alcover, Arcilla, De los Santos, ug Rama adunay tag-usa ka ordinansa.

Adunay mga ordinansa ug resolusyon ang kontrobersiyal sa niaging tuig lakip niini ang kang Gabuya nga ordinansa nga naghatag og pagtugot sa mga traffic enforcer sa siyudad sa pagkompiska sa driver’s license kon makalapas kini sa balaod sa trapiko.

Apan hangtud karon wala pa kini gipaimplementar sa Cebu City Transportation Office tungod kay nag-umol pa og adjudication board. (/BDB)(BANATNEWS)