CEBU, Philippines — Walay angay kabalak-an ang katawhan karong ipahigayon ang fluvial procession matud pa sa PAGASA sa rehiyon.
Si Engr. Al Quiblat, ang hepe sa PAGASA Central Visayas bisan paman sa pagsulod sa low pressure area sa nasud, dili angay mabalaka ang mga deboto ni Sr. Santo Nino kay slight to moderate open sea ang forecast ug sa Mactan Channel, slight ra.
Giingong gamay ra ang kahigayonan nga moulan karong buntag apan kon anaa, hinay nga pat-ak pat-ak lang kini kon itandi sa ilang forecast karong gabii mao nga atol sa foot procession magdala og panagang sa ulan sama sa payong ug kapote.
Laing gibutyag ni Quiblat nga atol sa Sinulog Grand Parade ugma, madag-umon ug adunay katag, hinay, kasarangan ug kusog nga ulan. Mao nga iyang awhag sa katawhan nga kanunay magmabinantayon sa lakat sa panahon ug magpaminaw sa mga taho nga ilang ipadangat.
Samtang si Fr. Aladdin Luzon, OSA, director for safety, security, peace and order, miingon nga aduna na silay mga giandam nga contingency plan kon ugaling bati gyud ang kahimtang sa panahon. (/DILT)(BANATNEWS)