Dihang mihulip ang maayong kapalaran

CEBU, Philippines — Maglisod sa pagsaysay sa iyang kagahapon gumikan kay dili malikayan ang pagtubod sa iyang mga luha.

Mao gyud kini ang kasagaran nga sitwasyon sa negosyante nga si Hildi Montesclaros o nailhan sa kadaghanan isip Ate Ging kun mahisgotan ang istorya sa iyang kinabuhi.

Nagdako si Ate Ging  sa Bukidnon  uban sa  simpleng pamilya ug nakaangkon og maayong edukasyon, gani sa kaulohan siya nakahuman sa kolehiyo sa kursong AB English  sa Far Eastern University  niadtong 1968.

“Niadtong higayona, naa raman sa Manila gi-offer ang akong course. Maong kinahanglan gyud ko molarga,” matud pa niya.

Pito sila ka magsuon ug nagbuwag na ang ilang mga dalan human sila nangaminyo.

Sa habig ni Ate Ging, naminyo siya kang Gil  nga taga Medellin hinungdan nga sa Cebu na sila nanimpad.

Nakabaton sila og tulo ka mga anak nga puros lalaki nga sila si Alain, Ady ug Jungkoy.

Nakatrabaho siya isip magtutudlo kaniadto, samtang ang iyang bana naa ra sa ilang panimalay aron magbantay sa ilang mga anak.

Apan sama nga nadat-ogan siya sa kalibutan sa dihang nipanaw ang iyang bana niadtong  1989.

Nagsugod og takilid ang iyang kinabuhi gumikan kay kinahanglan siya nga moundang og trabaho aron makabantay sa iyang mga anak.

Pait kaayo ang kinabuhi ni Ate Ging gumikan kay bisan unsa nalang ang sudlan niya nga raket aron lang gyud maka-kaon ang iyang  mga anak. Usa na niini ang pagtabang-tabang  sa parlor sa iyang silingan.

“Gagmay paman ako mga anak niadtong higayona.  Usahay dili lang gyud intawn mi ka-kaon. Sige lang inom og tubig,” matud pa niya.

Dili na usab maihap ang pagbalhin-balhin  niya og panimalay gumikan kay dili na siya kabayad sa abangan.

“Usahay inig-uli nako, mag-atang nalang sa gawas  sa balay ang among mga gamit kay palayason nami. Lisod gyud kaayo, maglisod man gani sa pagkaon, samot na sa abangan sa balay,” suma pa niya.

Bilib lang gyud siya sa iyang mga anak gumikan kay dili gyud moreklamo bisan klaro na kaayo nga gigutom na ang ilang mga dagway.

“Kutob nalang intawn ko sa paghilak sa higayon nga makakita ko sa ako mga anak  nga puwerti nang gutoma. Igo ra intawn sila mopahiyom.  Nakasabot rapud sila sa among sitwasyon.  Naay time nga nga kita gyud ko nga ilang gipunit  ang kinan-an nga mangga aron maka-kaon,” emosyonal nga  paghinumdom ni Ate Ging.

Pila usab siya ka tuig nga naka-istar sa grahian  sa babaye nga  nalouy kaniya uban sa iyang mga anak.

“Didto ra gyud mi nag-istar sa grahian sa sakyanan sulod sa pila ka tuig.  Hangtod kinahanglan nami mobalhin kay gamiton na nila ang area,” matud pa niya.

Padayon ang pagbalhin-balhin niya og balay busa wala gyud mahunong ang kapait sa iyang kinabuhi hangtod nga nagsige na siya og kasakit.

Duna’y  mga higayon nga hugasan nila ang lamaw ug ilang  initon aron lang gyud  duna sila’y  makaon.

“Basta kaning sitwasyona, makahilak gyud ko. Wala namo damha nga maka-kaon mi og lamaw, amo lang siyang hugasan para lang dunay masulod sa among tiyan kay gutom naman gyud kaayo,” matud pa niya.

Malipayon nalang pud siya gumikan kay dunay mga silingan nga mohatag kanila og pagkaon.

“Dili man pud ko mangayo nila kay maulaw baya ko, pero nakita seguro nila ang pait nako nga kahimtang. Dili naman sad ko maka-raket kay luya naman atong  lawas,” matud pa ni Ate Ging.

Dihay higayon nga namunit suya og kamoteng kahoy nga gidungog kaniadto nga makahilo.

“Dunay kamoteng kahoy sa amo silingan, amo nalang gyud girisgo kay gidungog man tu nga makahilo nga pagkaon ilabi na kung maahat og kuha.  Pero gutom naman kaayo, nikaon nalang gyud mi ug andam mi modawat kung unsa ang mahitabo namo. Pero kalouy sa Dios, wala man mi nangaunsa sa among gikaon,” dugang pa niya.

Padayon pagpakabuhi ni Ate Ging uban sa ginagmay nga tabang sa iyang mga higala nga mohatag kaniya og pagkaon apan nasayod siya nga dili kini permanente sanglit nag-agad raman sila niini hinungdan nga kanunay gyud sila magutman.

Nakabalik na usab siya og puyo didto sa Mindanano.

Naabot sa panahon nga nisamot kaluya ang iyang lawas  ug maglisod na siya og lihok.

Dinhi nakahuna-huna ang iyang mga anak nga dalhon siya sa tambalanan.

Samtang nag-atang sila og kasakyan nga tricycle, dunay babaye nga iyang silingan ang nakakita sa iyang sitwasyon.

Dili sila kaila sa iyang silingan apan nitunol kini og herbal granules kaniya ug giingnan siya nga suwayan niya ang pagtumar niini.

Pag-uli niya sa panimalay gikan sa tambalanan, wala niya kalimti ang granules nga iyang nadawat nga matud pa gikan sa nagsagol-sagol nga spices.

“Gikan man daw tu sa laing nasud. Ako nalang pud gisuwayan ang iyang tambag. Kay mao man sad daw ang nakaayo sa laing silingan nako nga nasakit .  Nahibulong ko , sulod sa pila ka adlaw,  makalihok naman og tarong ang akong lawas. Mao raman gyud tu ako gitumar kay dili man ko ka-afford  og mga tambal ,” saysay pa niya. Didto nasulod sa iyang huna-huna nga mag-angkat sa iyang silingan og herbal granules ug siya lang mo-repack.

Giutang pa gani niya sa iyang igsuon ang puhonan niini nga P90 .

“Nihangyo ko sa ako igsuon nga naa sa Manila, nga padalhan ko niya og kuwarta para ako mapuhonan.  Gipadalhan ko niya og P100, kay ang P90 ana maoy puhonan, samtang ang P10 maoy  plite sa pagkuha og stocks ,” suma pa niya.

Nikisaw ang istorya sa ilang dapit unsa ka epektibo sa giangkat niya nga herbal granules.

Hangtud nga nikusog gyud ang halin niini  ug pag-abot sa pila ka tuig, nakahuna-huna siya nga himuon kini nga capsule ug dinhi namugna ang Bio-Troff  Herbal Food Supplement.

“Nagsugod ko sa ginagmay nako nga negosyo sa nag-edad ko og 50 anyos,  akong edad karon kay 70 na.  So makaingon ta nga dili pa ulahi ang tanan sa pagdawat og blessings  gikan sa Ginoo. Wala na mo-matter sa edad, maong maningkamot gyud ta, kay motabang gyud nato ang Ginoo, “ suma pa ni Ate Ging.

Ang iyang pagkamahinatagon maoy usa sa iyang mga hiyas maong dili gyud siya malimtan sa mga tawong nagpalibot kaniya.

Dili madinumtanon si Ate Ging. Sa panahon nga nagkalisod siya, dunay gyu’y mga tawo ang  wala manumbaling kaniya ug gitalikdan siya niini.  Sa dihang nisaka na ang istado sa iyang kinabuhi, kusog na kaayo kini managad kaniya ug mangayo og tabang..

Mopatigbabaw gyud ang pagka-buotan ni Ate Ging gumikan kay gitabangan gihapon niya karon ang mga tawong wala gyud molingi niya kaniadto.

“Dili na lang ta maghuna-huna ana, basta duna lang tay ikatabang, sige tabangan nato. Ang nahimutangan nako karon kay tungod na sa Ginoo maong magpasalamat gyud ko niya,” panapos pa niya.