CEBU, Philippines — Gipahibalo sa kapolisan sa Lapu-Lapu City Police Office (LCPO) ang pagsirado sa Mandaue-Mactan Bridge aron mahatagan og kahigayonan ang mga deboto ni Señor Sto. Niño nga makalakaw paingon sa tunga-tungang bahin sa maong taytayan aron sa pagsaksi sa molabay nga galleon nga luwanan sa imahe sa Balaang Bata atol unya sa fluvial procession karong Enero 19.
Gibawi ni LCPO director PSSupt. Limuel Obon ang unang napahibawo nga dili tugotan ang mga tawo sa pag-adto sa taytayan sa habig sa maong dakbayan.
Matud ni Obon nga ilang ipatuman ang istrikto nga pagsusi sa mga tawo nga mosaka sa taytayan pagsiguro nga walay magdala og gidili nga mga butang sama sa armas, balloon, pabuto, ilimnong makahubog ug hait nga hinagiban.
Subay niini ang City Traffic Management System (CTMS) sa Lapu-Lapu City mipahibalo ngadto sa mga motorista nga atol sa adlaw sa pagbisita sa imahe ni Señor Sto. Niño sa ilang lugar karong Enero 19 aduna silay himuon nga re-routing.
Naglakip sa ilang traffic advisory mao ang pagsirado sa mga dalan nga magsugod sa ala 1:30 sa kaadlawon sa tibuok dalan G.Y. dela Serna ug tipik nga bahin sa M.L. Quezon national highway nga magsugod sa tiilan sa Mactan-Mandaue Bridge ug molahos sa eskina sa dalan P. Rodriguez sa Looc Central School.
Samtang ang dalan S. Osmeña nga magsugod sa eskina Ceres St. paingon sa eskina sa dalan Lopez Jaena. Malakip usab sa pagsirado sanglit mao man kini ang dapit nga nagsilbing main entrance sa simbahan. Sirado usab ang dalan Lopez Jaena gikan sa dalan Mantawi hangtud na ngadto sa eskina dalan P. Rodriguez ug eskina dalan Dad Cleland.
Hinuon ang buhatan sa CTMS nga gipangulohan ni Mario Napuli miingon nga ang tanang motorista nga mopaingon sa Sugbo, Mandaue ug MEPZ 1 nga nagagikan sa Looc, Babag ug Cordova mahimong mogamit sa dalan A. Tumulak pinaagi sa dalan Mejiin, S. Osmeña ug ingon man sa Hoopsdome Road.
Ang himuon lang nila mao ang pagdesilya sa M.L. Quezon national highway sa Brgy. Pajo ug molahos paingon sa Marcelo Fernan Bridge. (/DILT)(BANATNEWS)