Kabukiran magka-signal na sa selpon
CEBU, Philippines — Mga residente sa kabukiran sa syudad makatagamtam na og nindot nga network signal human giaprobahan sa Cebu City Zoning Board ang daghang aplikasyon sa pagtukod og cell sites sa telecommunication diri sa syudad.
Sa miaging Huwebes gi-aprubahan sa zoning board ang walo ka applications sa Smart Communication apil na ang tulo ka cell sites sa bukid sa syudad, sigon ni Konsehal Alvin Arcilla kinsa maoy co-chairman sa zoning board.
Ang tulo ka cellsites sa bukid didto ibutang sa Binaliw, Bonbon, ug Guba.
“Mayor Tom (Tomas Osmeña) already manifested to all telecommunication companies that they should address the dead spots of network signals in the mountain barangays,” matud ni Arcilla.
Dugang niya nga dunay 15 ka cell sites ang gi-apply sa Smart Communications ug sa Globe. Posibleng ma aprobahan usab ang gi-apply sa Globe sunod semana.
Matud ni Arcilla nga una nang giwarningan ni Osmeña tanang mga telecommunications nga dili aprobahan ang cell sites sa urban area kon dili masulbad ang dead spots sa bukid.
Una maabot ang mga kompanya sa zoning board, angay silang pahimoon og public hearing sa barangay diin tukoron ang mga cell sites.
Human niana, ila kining isumiter sa zoning board ug kun maaprobahan mamahimo na silang molukat sa ilang permit to construct sa cell sites ngadto sa Office of the Building Official sa syudad.
Sa miaging Biyernes, si Osmeña mi-announce sa iyang Facebook page nga ang maong mga cell sites magsugod og operate karon Disyembre.
“The City has requested over 15 cell sites to be put up in the mountain areas to help increase coverage and improve our responsiveness. Things are coming together well,” matud pa sa post ni Osmeña. – IBM, (BANATNEWS)
- Latest
