Duha napusilan, nadunggaban

CEBU, Philippines — Talandugon ang kahimtang sa 22- anyos nga lalaki human kini gikatahong napusilan sa usa ka barangay tanod samtang naghigda-higda sa lantay sa Sitio Ylaya, Barangay Kampo Otso, sa Lungsod sa Minglanilla kagahapon sa buntag.

Samtang  41-anyos nga lalaki usab ang kritikal human gidunggab sa 22 anyos nga kainom ginamit ang gunting sa tanom  diha sa Barangay Kamputhaw, Dakbayan sa Sugbo niadtong Biyernes sa gabii.

Didto sa Minglanilla, giila sa kapolisan ang biktima nga si Bryan Baclaan,22 anyos ug residente sa maong dapit.

Si Police Officer 2 Jefferson Base sa Minglanilla Police Station miingon sa Banat News nga naghigda sa lantay ang biktima sa dihang kalit siyang giduol sa suspetsado ug gipusil sa iyang tangkugo.

Ang mamumuno mao si Guilly Segundino, usa ka barangay tanod sa barangay Manduang.

"Ang mismong biktima nakaestorya pa ni sa iyang igsuon kung kinsa ang nagpusil niya," si Base miingon sa Banat News.

Gidala sa Carmen Copper Corporation Hospital ang biktima apan giingong kritikal ang kahimtang niini  ug gidala sa usa sa mga tambalanan sa Dakbayan sa Sugbo.

Wala pa nila matino kun unsa ang motibo sa maong krimen.  Nagpahigayon og hot pursuit operation ang kapolisan batok sa gitumbok nga suspetsado apan niining pagsuwat, wala pa kini madakpi.

Sa Dakbayan sa Sugbo, gidunggab ang biktima nga si Nimrod Bulay ,41, lumad nga taga Camotes sa iyang kainom nga giila nga si Juan Bayhonon Catalan, 24.

Ang hepe sa Cebu City Police Station 2 nga si Police Senior Inspector Eduard Sanchez miingon sa Banat News nga hubog ang duha ug nagkalalis nga misangpot sa pagpanunggab.

Nakuha pa sa kapolisan ang gunting sa tanom nga maoy gidudahang gigamit ni Catalan. Ang gunting aduna pay mga lama sa dugo nga gituohang iya ni Bulay.

Gidala sa tambalanan ang biktima ug giingong operahanan kini samtang nadakpan sa kapolisan ang suspek. (Camille Pateres/IBM)(BANATNEWS)