Illegal parking duol sa mga sam-ang pamultahon

CEBU, Philippines — Atol sa pag-obserbar sa All Saint's ug All Soul's Day ang Cebu City Transportation Office(CCTO) nakakuha og P20,000 sa implimentasyon sa anti-double parking ug no parking policy duol sa mga sam-ang.

Sigon sa Operation's Chief sa CCTO Francisco Ouano nga dunay upat ka motorsiklo ang na-impound gumikan sa illegal nga pag-park sa exit ug entrance sa Calamba ug Queen City Cemetery.

Matud niya gawas sa pag-impound sa motorsiklo,ang tag-iya mobayad sab og multa nga nagkantidad og P2,500 subay na sa nakalatid sa balaod. Ang mga driver tugutan nga makakuha sa ilang mga motorsiklo sa adlaw'ng Lunes sigon ni Ouano.

“Yes, atong gi-allow nga mo park bisan asa basta dili lang mo-park diha sa vicinity entrance ug exit sa mga menteryo," ni Ouano pa.

Base sa records, ang mga traffic enforcers mi-isyu sab og citation tickets sa dili momenus 10 ka sakyanan nga nasakpan nga nakalapas sa anti-double parking policy diha sa Cempark Cemetery.

Hinungdan nga wala'y record nga duna sila'y gi-clamp nga sakyanan gumikan sa illegal parking.

“Tungod kay atoang gihatagan og higayon nga ang mga tawo makabisita sa menteryo," pasabot ni Ouano.

Sa matag sam-ang dunay gitagana nga parking lot aron ang lugar dili maghuot sa motorsiklo ug sakyanan.  Gan wala usab gipatuman ang anti-counterflowing policy sanglit madala ra ang kondisyon sa traffic. Asoy ni Ouano, dili momenus 300 ka mga traffic enforcers ang gipakatap nianang adlawa aron mobantay sa dagan sa trapiko sa siyudad.

Sukad niadtong Oktubre 31 hantod Nobiyembre 2 wala na sila tuguti nga maka day off ug mo-leave aron maka-monitor ug makabantay sila sa kadalanan.

“So far, naa'y area nga mohuot kay mao lagi na, mo double park sila, hinay ang unloading and loading maong nakamugna og traffic sa may Cempark. Ang ubang menteryo like sa Calamba, moderate ra siya, Carreta and Queen City," asoy ni Ouano. (/IBM)(BANATNEWS)