Duha ka gipamatay giunay sa kauban?

CEBU, Philippines – Ang away sa ginadiling drugas maoy usa sa mga gitumbok sa kapolisan nga hinungdan sa pagpatay  duha ka suspetsadong kriminal kinsa ang mga patay’ng lawas napalgan ngadto sa Dakbayan sa Toledo niadtong Huwebes sa buntag.

Kini maoy gibutyag ni Chief Superintendent Debold Sinas, direktor sa Police Regional Office (PRO)-7.

Ang patay’ng lawas nila ni Juniel Abatayo ug Abelardo Salomag napalgan diha sa Barangay Campo 8, Dakbayan sa Toledo.

Matud ni Sinas nga susihon nila ang taho nga ang duha giingong nadakpan kaniadto sa Philippine Drug Enforcement Agency (PDEA)-7 tungod sa pagkalambigit sa ginadiling drugas.

Gawas niini, ang duha giingong nalambigit usab sa pagpangawat og motorsiklo diin ang ilang hide-out anaa diha sa Dakbayan sa Talisay.

Si Sinas nagkanayon nga ang maong grupo nagkaaway nga maoy hinungdan nga nag-unay kini og pinatyanay.

Matud usab ni Sinas nga nakugang siya nga polis na usab ang gilambigit nga nipatay nila ni Abatayo ug Salomag.

Giawhag ni Sinas ang katawhan nga kong adunay ebidensiya nga magtumbok nga polis ang nipatay sa duha mahimo kining modangop diha sa ilahang buhatan tungod kay dili sila mokonsinti sa maong binuhatan ug bukas usab sila sa imbestigasyon sa ubang mga ahensiya.

Sa laing bahin, andam nga motubag ang kapolisan sa Dakbayan sa Talisay kon masang-at og  reklamo batok kanila ang kabanay nila ni Abatayo ug Salomag.

Si Chief Inspector Ardiolito Cabagnot, deputy chief sa Talisay City Police Station nagkanayon nga katungod sa tawo ang pagpasaka og kaso ug tubagon nila ang pasangil  batok kanila.

Matud ni Cabagnot nga giturn-over sa iyang mga sakop ngadto sa kapolisan sa Dakbayan sa Lapu-Lapu si Abatayo ug Salomag human sila nadakpan.

Si Abatayo ug Salomag suspetsado sa insidente sa carnap sa Dakbayan sa Lapu-Lapu.

Apan si Evelyn Abatayo, inahan ni Juniel nipasangil sa mga polis nga maoy responsable sa pagpatay sa iyang anak ug sa kuyog niini.

Samtang si Ebony Salomag, asawa ni Abelardo nagkanayon nga suhitong mouli sa ilang balay ang iyang bana kong ugaling gibuhian kini. (Gabriel c. Bonjoc/BDB)(BANAT NEWS)