CEBU, Philippines – Gipusil patay ang usa ka habalhabal driver kagahapon sa hapon sa wala mailhing mga tawo nga nagsakay og motorsiklo didto Barangay Tipolo, Dakbayan sa Mandaue.
Patay diha dayon si Victor Balaba, residente sa Purok Villamangga, Barangay Opao pasado alas 4 sa hapon.
Matud ni Chief Inspector Mercy Villaro, tigpamaba sa Mandaue City Police Office (MCPO) nga basi sa pakisusi sa kapolisan, nga usa ka drug surrenderer ang biktima.
Gikatahong mihunong kadali si Balaba sa iyahang motorsiklo sa kilid sa MyBus Station sa usa ka mall didto sa C. D. Seno Street, dapit sa Cebu International Convention Center kon CICC sa dihang kalit nitumaw ang duha ka tawong nagsakay og usa ka motorsiklo ug diha dayon gipusil ang maong biktima.
Gikatahong bagohay lang pud nakapiyansa sa kaso sa illegal nga drugas si Balaba. Daling nakaikyas ang nagpaluyo sa pagpamusil..
Dunay nakabantay sa buto sa pusil apan gikatahong walay nakakita o nakahulagway sa nawong sa mga nagpusil sa biktima tungod kay nagtaptap kini sa nawong.
Sa pagkakaron, gipadayon pa sa kapolisan ang imbestigasyon sa maong pagpatay. (/IBM)(BANAT NEWS)