CEBU, Philippines – Suwayan sa City Legal Office sa Talisay ang paghangyo sa Siyudad sa Naga nga ipahiluna ang mga residente sa Sitio Tiguib, Barangay Lagtang nga nabalaka nga matabunan sa bukid gumikan sa quarry sa QM Builders.
Si Talisay City Legal Officer, Atty. Giovanni Sususco, niingon nga hangyoon niya si Naga City Mayor Kristine Vannessa Chiong nga mapahiluna sab ang moabot sa 60 ka pamilya nga anaa karon sa Tabunok Sports Complex sulod na sa tulo ka semana.
Kini human ang mga opisyal sa Dakbayan sa Talisay naglisud sa paghatag og relocation site sa mga apektadong pamilya tungod kay wala na man silay luna.
Ang Kapitolyo nihatag og gamay nga bahin sa Balili lot diin ipahimutang ang mga apektadong pamilya sa landslide sa Tinaan, Dakbayan sa Naga.
Nakabalik na ang operasyon sa quarry sa QM Builders human sa pakisusi sa Provincial Environment and Natural Resources Office (PENRO) diin dunay gipasunod nga lagda.
Nipasalig ang kompaniya nga moabaga sa lugar nga kabalhinan sa mga molupyo apan kutob lang sa 29 ka pamilya ang ilang duphan tungod kay mao gyud kini sila ang klarong apektado.
Si kanhi bise mayor Romeo Villarante nibati sa kabalaka sa mga residente sa lugar ug nipadayag nga unta aksyonan sa kagamhanan ug sa ubang ahensya sa gobiyerno nga eksperto sa kabukiran. Matud ni Villarante nga dili ipakagamay ang kabalaka sa mga molupyo tungod kay dili gyud matag-an ang trahedya. (/GMR)(BANAT NEWS)