CEBU, Philippines — Usa ka 41-anyos nga lalaki ang gipadakop ug gipasakaan og kaso tungod sa pagtuok niini sa usa pa ka tuig nga masuso nga anak sa ilang silingan tungod kay nagtuo kining ‘tiyanak’ ang biktima.
Ang 23-anyos nga inahan sa masuso nga taga Kamagong, Barangay Lahug, Cebu City mireklamo batok sa silingang si Manuelito Camomot kinsa gipasanginlan niyang tiggamitan og ilegal nga drugas ug kusog manghadlok sa iyang mga anak.
Ang pagtuok sa masuso niyang anak nahitabo niadtong Oktubre 4, 2018, sa alas 10 sa buntag diha sa gawas sa giabangan nilang kwarto.
Matud sa inahan diha sa iyang reklamo gipabantayan niya ang iyang anak sa iyang humablos nga batang babaye kay naligo siya niadtong tungora. Apan sa dihang nigawas na siya sa banyo, nakita niya ang suspek nga gituok na ang iyang masuso ug nagsige kini og singgit og “tiyanak.”
Diha-diha daling gihamagan sa reklamante ang suspek aron makuha ang anak samtang ang ubang silingan nanawag og tanod ug polis. Pag-abot sa mga polis gidakop dayon si Camomot.
Sa inquest proceeding, si Camomot nagdumili pagpaubos og preliminary investigation kay matud pa niya atubangon niya ang kaso ngadto sa korte.
Si Prosecutor II Jennifer Karen Alo-Leyson mirekomendar og piyansa nga P80 mil alang sa temporaryong kagawasan ni Camomot. (BANAT NEWS)