CEBU, Philippines – Kapin usa ka milyon ka pesos ang nakuha sa duha ka tulisan gikan sa usa ka Taiwanese kinsa gikan nag-withdraw og dolyar sa bangko sa may MJ Cuenco Avenue, Mabolo, Dakbayan sa Sugbo kagahapon sa hapon.
Ang biktima giila sa kapolisan nga si Pien Shu Ching, hingkod ug giingong bag-o lang naabot gikan sa Taiwan ug kauban niini nga si Felipe Co Tan nga taga Banilad, Siyudad sa Sugbo.
Padulong na unta mosakay sa sakyanan ang mga biktima dihang gilabnot sa duha ka wala mailhing tulisan nga sakay og motorsiklo ang bag niini.
Gibana-bana nga $19,400 o kapin sa usa ka milyon ka pesos ang sulod sa bag.
Motabang unta ang guwardiya apan gipusil kini sa tulisan ug swerte nga nakalihay samtang nakasibat ang mga tulisan.
Matud sa hepe sa kapolisan sa Mabolo, Chief Insp. Dindo Alaras, nga ila karong gisubay ang closed circuit television (CCTV) camera sa lugar aron sa pag-ila sa mga tulisan. (/GMR)(BANAT NEWS)