500 pamilya pabakwiton

CEBU, Philippines — Moabot sa 500 ka pamilya sa Barangay Lagtang, Dakbayan sa Talisay ang giplanohan nga pabakwiton tungod sa dagkong bato nga nagpatong sa bukirong bahin sa barangay nga gikabalak-ang maligid paubos kon daotan ang panahon.

Si Lagtang Barangay Kapitan Chester Salceda miingon nga ang maong mga pamilya nagpuyo diha sa Sitio Quadra, Burlas, Tiguib ug Luyungan.

Asoy pa niya nga sa ilang pagsusi sa lugar nakita gyud nila ang dakong bato nga adunay mga katupad nga ubay-ubay nga gagmay nga bato nga kuyaw  maligid kon mohumok ang yuta tungod sa uwan.

Kagahapon  adlawa nakigkita si Salceda ni Mayor Eduardo Gullas ug gipahibawo sa sitwasyon.

Daling nihimo og inspeksyon ang taga Bureau of Fire Protection (BFP), taga Disaster Risk Reduction and Management Office (CDRRMO) ug sa mapping personnel apan wala pay gipagawas nga resulta.

Matud pa nga adto lang una ihiklin sa mga gymnasiums sa Tabunok ug sa Poblacion ang mga pabakwiton ug mihangyo si Salceda ni Gullas nga tabangan sa ilang gikinahanglan ang maapektahan.

Siya miingon nga plano nilang kuhaon ang maong mga bato sa ibabaw ug kon masigurong luwas na ang lugar ayha pa sila pabalikon. – IBM (BANAT NEWS)