CEBU, Philippines — Giawhag ni Auxiliary Bishop Dennis Villarojo ang mga biktima sa pagdahili sa yuta sa Sitio Tagaytay ug Sindulan sa Barangay Tinaan, Dakbayan sa Naga ilabi na kadtong nakalasan og sakop sa pamilya nga dili mawagtangan og paglaum.
Atol sa Santos nga Misa ni Villarojo, gipahimug-atan niini ang tulo ka mahinungdanong butang alang sa mga nawad-an sa ilang mga minahal sa kinabuhi nga wala sila mag-inusara tungod kay daghan ang nipadangat sa ilang tabang ug pakighiusa lakip sa gikan sa laing lugar. Kini nagpakita nga bisan sila nalang usa ang nahabalin sa ilang banay, ang mga tawo nag-alirong kanila.
Matud sa Obispo nga atol sa mga kasakitan sa tawo ang Dios wala mobiya ug gani anaa kini duol sa mga tawo nibati usab sa kasakit.
Dugang ni Villarojo nga ang kamatayon dili maoy katapusan bisan pa man og ang lawas nagsugod na pagkatun-as apan dili kini maoy katapusan kay ang kalag sa tawo pabilin nga buhi ug padayon lang mohupot sa gugma sa pagsalig sa Langitnong Amahan.
Gisanglitanan sa obispo ang pagsalop sa adlaw apan adunay bag-ong kabuntagon nga moabot diin sa pagkakaron dili pa masabtan sa mga pamilya nga nagbangutan.
Si Villarojo maoy unang nipahigayon og Santos nga Misa sa haya sa mga nakalas sa landslide nga gipahimutang sa badminton court sa Dakbayan sa Naga human sab nipahigayon og paghalad sa pag-ampo si Archbishop Jose Palma. (BANAT NEWS)