Ama-ama nanghilabot sa anak-anak
CEBU, Philippines — Usa ka ama-ama ang nagtingkagol sa Toledo City Police Station human giamong-amongan ang iyang anak-anak sa bukiran nga barangay sa dakbayan.
Ang biktima usa ka 10-anyos nga tinun-an sa grade 6.
Matud ni Senior Police Officer 1 Violeta Godinez, imbestigador sa Toledo City Police Station, nga kanunay wala sa panimalay ang inahan sa bata tungod kay nagtrabaho hinungdan nga makahimo gyud ang suspek sa pag-among-among sa bata.
Sumala pa ni Godinez nga tungod kay napuno na ang bata sa paghilabot sa iyang ama-ama, nagpakitabang kini sa iyang apohan pinaagi sa pagtug-an sa iyang gidangatan.
Dugang ni Godinez nga daling nagpakitabang ang apohan sa bata sa kapolisan hinungdan nga nipahigayon sila og operation ug nasikop ang suspek.
Ang bata anaa pa sa pink room sa Vicente Sotto Memorial Medical Center samtang padayon pa kini nga gihiling sa mga doktor.
Tinguha sa apohan sa bata nga mopasaka og kaso pagpanglugos ug pag-abuso sa bata batok sa ama-ama.
Kasamtangang nagtingkagol ang suspek samtang giandam ang pagsang-at sa tukmang kaso. (BANAT NEWS)
- Latest
