Bong Go suportado sa kahugpungan sa mga mayor

CEBU, Philippines — Giduso sa mga municipal mayor sa Kabisay-an si Special Assistant to the President, Secretary Christopher Lawrence "Bong" Go nga padaganon pagka senador sa sunod tuig nga piniliay.

Atol sa Visayas Island Cluster Conference nga gihimo sa Dakbayan sa Sugbo niadtong Martes nga gitambongan mismo ni Presidente Rodrigo Duterte, kapin sa 300 ka mga municipal mayor ang mi-adopt sa resolusyon nga nagdeklarar sa "unequivocal support" sa grupo alang sa kandidatura ni Go.

Si Mayor Democrito Diamante Jr. sa Lungsod sa Tuburan, Cebu miingon nga ang resolusyon nga nagsuporta kang Go gihimo atol sa League of Municipalities of the Philippines (LMP) National Directorate meeting nga gitambungan sa 81 ka provincial chapter presidents sa tibuok nasud.

Dugang ni Diamante nga kapin sa 422 ka municipal mayors ang mihangop sa maong resolusyon atol sa Mindanao Island Cluster Conference didto sa Davao City niadtong Hulyo 13 ug gisundan sa mga mayor sa Kabisay-an.

“The Filipino people are in need of public servants with high competence, integrity, sincerity, and of known probity to serve and lead this country,” deklarasyon sa maong grupo pinaagi sa ilang resolusyon.

Si Diamante   maoy pangulo sa LMP Cebu Province chapter ug national vice president sa Visayas. (/DILT)(BANATNEWS)