157 tricycle drivers sa Danao magtukod og negosyo

CEBU, Philippines – Gawas sa pagpamasada ang 157 ka drayber sa traysikol sa Dakbayan sa Danao ang gikatakdang mo-operate og Motorcycle Repair and Body Building Shop and Fast Moving Basic Parts Trading isip alternatibo nilang negosyo o panginabuhian.

Ang maong mga drayber miyembro sa Danao Compostela Tricycle Operators and Drivers Association (DACOTODA) niining ulahi lang nakadawat sa DOLE Integrated Livelihood and Emergency Employment Program (DILEEP).

Si Department of Labor and Employment (DOLE)-7 director, Alvin Villamor personal nga nitunol sa P823,650 nga pinansiyal nga hinabang alang sa panginabuhian sa mga nakabenepisyo.

Matud ni Rogelio Redordo, presidente sa maong asosasyon nga kadaghanan sa ilang miyembro nawad-an na kini og kadasig  apan siya nagpadayon sa pagbalik ngadto sa DOLE aron mahatagan sila og hinabang sa mao nilang panginabuhian.

Si Maria Grace Diaz, DOLE-Cebu Provincial Field Office (CPFO) head nagkanayon nga tanang mga project proposals nga gisumitir kinahanglan nga moagi sa proseso pinaagi sa evaluation ug validation aron masiguro nga ang mga rekisitos ubos sa DOLE's Kabuhayan Program nakompleto kini. (SWU-Phinma Intern/BDB)(BANAT NEWS)