CEBU, Philippines – Nagpabiling normal ang dagan sa mga sakyanan agi sa UN Avenue, Umapad, Dakbayan sa Mandaue bisan sa pagsugod na sa phase one sa tri-level flyover project.
Kini nunot sab sa pahibawo sa Department of Public Works and Highways nga dili mosirado og bahin sa karsada samtang magpadayon ang kaugmaran sa maong proyekto.
Matud ni Glenn Antigua, hepe sa Traffic Enforcement Agency of Mandaue (TEAM), nga adunay upat ka traffic enforcers ang gidestino sa lugar nga maoy mogiya sa mga drayber samtang wala pa kinahanglana ang dugang traffic enforcers.
Si DPWH-7 Regional Director Ador Canlas sa sayo pa niingon nga dili sila mosirado og bahin sa UN Avenue tungod kay sagad sa himoon mao lang ang paghawan sa center island, mga kahoy ug mga electric posts ug luna alang sa construction sa service lanes.
Si Mandaue City Mayor Gabriel Luis “Luigi” Quisumbing ang naneguro na daan ngadto sa DPWH-7 nga ang buhatan sa TEAM mohimo og tukmang koordinasyon alang sa paghapsay sa dagan sa mga sakyanan sa first phase sa UN Avenue underpass project. (/GMR)(BANAT NEWS)