Mga sakyanan sa Cebu City way rehistro?

CEBU, Philippines — Ang Land Transportation Office 7 namasangil nga daghang sakyanan nga iya sa Dakbayan sa Sugbo ang expired na ang mga rehistro.

Reaksyon kini ni LTO-7 regional director Victor Caindec sa pagpanaway kanila ni Cebu City Mayor Tomas Osmeña diha sa social media bahin sa mga motorsiklong wala pay plaka apan nagsige na og dagan sa kadalanan.

Matud pa ni Caindec adunay 240 ka sakyanan ang siyudad apan ang 156  niini expired na ang rehistro ug mao untay angay unahon ug dili ang pagpanghilabot sa ilang buhatan.

Siya midugang nga mas maayong buhaton sa nag-post sa social media nga nag-warning kanila sa LTO nga mas maayong magbaylo sila og pwesto.

Si Caindec miingon nga daghan pa unta nga angay atimanon ang mayor sama sa pagsulbad sa problema sa baha, traffic, basura, ug ang pagparehistro sa mga sakyanan sa dakbayan.

Sumala pa niya naninguha ang LTO nga maapas ang backlogs sa pagprinta sa lisensya ug mga plaka. Si Osmeña sa iyang bahin wala mahulga sa bahad ni Caindec pag-impound sa mga sakyanan sa dakbayan.

“You see how crazy this world is, I’m just trying to mind my own business here in Cebu but the behavior of some of this agencies give me a headache,” tubag sa mayor.

Apan ang pangulo sa General Services Office (GSO) Ronald Malacora mihimakak sa pasangil ni Caindec kay ang tanang sakyanan sa siyudad rehistrado gyud apan didto kini kasagaran narehistro sa Mindanao kay di modawat ang taga LTO-7 sa wala pa hibaw-ing rason.

“It’s been going on for mga 2012 pa na siya. Just like our buses before it was being registered here in Cebu City but years after they won’t accept so we have it registered in Mindanao because if we don’t have it registered dili nato magamit,” pasabot ni Malacora.

Miangkon siya nga dunay wala marehistro apan wala na magdagan kay guba ug kadtong ayuhunon pa. Matud pa ni Malacora adunay 800 ka mga sakyanan ug motorsiklo ang siyudad ug kining tanan rehistrado.

Sa pikas bahin, gihatagan og kinse ka adlaw sa LTO-7 ang LGUs pagparehistro sa ilang mga sakyanan nga adunay blinkers ug mogamit og mga wangwang aron dili kini dakpon sa kapulisan nga gi-deputized sa maong ahensya aron manakop.

Matud pa ni Caindec, angayan unahon og disiplina ang mga naa sa pangagamhanan aron mosunod ang mga yanong lungsuranon.

Sumala pa ni Caindec, gitugotan lamang nga makagamit og blinkers ug wangwang ang sakyanan sa militar, PNP, BFP, BJMP, NBI, LTO ug mga rescue vehicles ug gawas niini wala nay gihatagan og pagtugot.

Ang mga sakyanan sa LGUs nga way proper permits sa LTO nga migamit niini mahimong ma-impound. Nanawagan usab si Caindec sa mga nanag-iya og mga sakyanan nga wa pay plaka  sugod sa Hulyo 2016 ngadto sa Disyembre 2016 sa pagkuha na niini diha sa ilang buhatan kay mahimo na kining mataod.

Matud pa ni Caindec dili mominos usa pa ka libo ang nakakuha niini mao nga kinahanglang kuhaon na kini tungod kay posibleng manakop na sila og sugod sa mga walay plate numbers.

Gitug-an usab ni Caindec nga wala silay gi-release nga mga plaka ngadto sa mga dealers kung wala silay affidavit ug Special Power of Attorney nga ikapakita diha sa ilang buhatan.  (IBM) (BANAT NEWS)