Nidaghan ang drug- cleared barangays
CEBU, Philippines — Nidaghan karong tuiga ang natala sa Philippine Drug Enforcement Agency nga drug-cleared barangays sa Probinsiya sa Sugbo kaysa niaging tuig.
Sa buwan sa Marso karong tuiga, adunay 160 nga drug-cleared barangays ang natala sa probinsiya nga mas taas kaysa 120 sa niaging tuig.
Matud ni Carmen Remedios Durano-Meca, pangulo sa Cebu Provincial Anti-Drug Abuse Office, nga walay barangay ang seryusong naapektuhan sa probinsiya, 555 ang slightly affected, 455 ang moderately affected ug 21 ang wala gyud apektohi.
Ang CPADAO hugot nga nilusad sa tulo ka programa niining tuiga batok sa ginadiling drugas nga mao ang "Limpyo Probinsiya Program", "Sugbo Kontra Droga Program" (SUKOD), ug ang "Community-Based Treatment Program."
Ang SUKOD gilusad sa gobiyerno niadtong tuig 2014 apan karon gihingusgan sa CPADAO kauban ang Barangay Anti-Drug Abuse Councils (BADAC) sa paghimong mapuslanon ug epektibo.
Si Meca nitataw nga ang umaabot nga bag-ong opisyal sa mga barangay dili unta mahimong babag sa pagpadayon sa nasugdang programa.
Masaligon usab siya nga mapadayon ang pagsaka sa mga drug-cleared barangays sa Probinsiya sa Sugbo pinaagi sa mga mapuslanong matang sa programa nga gilusad sa gobiyerno. (Caren Abing, CNU Interns/GMR)(BANATNEWS)
- Latest
