CEBU, Philippines — Tulo ang nakalas sa nahitabong buwag nga insidente sa pagkalumos niadtong Domingo diin duha sa namatay mga bata ug ang usa mananagat nga nisuway pagsalbar og bata nga nalumos.
Nalumos ang 5- anyos nga batang babaye diha sa sapa sa Mananga sa Barangay Lagtang, dakbayan sa Talisay sa alas- 11 sa buntag.
Ang namatay mao si April Ann Tanriago, taga Sitio Iba sa maong barangay.
Ang inahan sa bata nisaysay sa mga otoridad nga nikuyog ang iyang bata sa iyang bana nga si Edward Tanriago aron mamasol sa sapa apan samtang namasol nataligam-an ang bata ug natagak kini sa tubig nga wala mamatikdi hinungdan sa pagkalumos.
Nakit-an dili layo sa gibarogan niini ug wa nay panimuot ug patay na pag-abot sa Talisay City District Hospital.
Sa laing insidente, patay ang usa ka 4-anyos nga si Shelmae Larino, human giingong nalumos dihang naligo sa dam sa barangay General Climaco siyudad sa Toledo.
Usa ka Candelaria Lemoran, residente sa dapit ang nagkanayon nga naligo ang bata kauban sa iyang mga maguwang ug silingan apan samtang naglangoy-langoy kalit kining nahanaw.
Ang maguwang sa biktima dali usab nakapangayo og tabang ug maoy nisawom aron sa pagpangita sa iyang manghod hangtud nga nakita kini sa ilawom ug gihaw-as apan pag-abot sa Toledo City Hospital wala na kini kinabuhi.
Sa lungsod sa Argao, nalumos usab si Kenneth Joy Boltiador, 41, usa ka mananagat dihang nisuway kini pagluwas og batang lalaking giingong diriyot malumos diha sa dunggoanan sa mga pasaheroang pumpboat sa Sitio Looc, Barangay Poblacion, Argao.
Matud pang Police Officer 1 Jayson Lobendina, Desk Officer sa Argao Police Station gituohang nakainom ang namatay dihang misuway kini pagluwas sa batang nalumos. Gidala sa Isidro Kintanar Hospital si Boltiador apan namatay kini. - Raymund Abarcas ug Rowena Capistrano (BANAT NEWS)