CEBU, Philippines — Duha ang patay samtang laing 10 ka tawo ang naangol sa managlahing aksidente sa Barangay Cansomoroy lungsod sa Balamban kagahapon sa hapon.
Unang panghitabo alas-3:00 sa hapon, usa ka Suzuki multicab nga nakaingon sa kamatayon sa usa ug lima ang naangol.
Giila ang namatay mao si Edgar Boglo, 49, taga Pusok dakbayan sa Lapu-Lapu samtang ang mga naangol mao sila si Ernesto Labiste, 56, Victor Villasencio, 41, ug Eutropo Labiste, 55.
Ang nagmaneho sa multicab nga si Edison Mateo 64, taga Banawa dakbayan sa Sugbo ang luwas ang kahimtang apan gikustodiya sa kapolisan.
Sa imbestigasyon ni Police Officer 3 Alby Agua gikan sa dakbayan sa Sugbo ang grupo paingon sa barangay Arpili sa maong lungsod apan pag-abot sa nahitaboan giingong nawad-an kini og preno hinungdan nga nawad-an og control ang drayber ug nalimbuwad makatulo ka higayon.
Paglabay sa kapin usa ka oras, usa ka Isuzu Elf Canter usab ang nalimbuwad sa mao gihapong barangay nga niresulta sa kamatayon ni Eric Brigole, 37, taga Tayud lungsod sa Liloan.
Naangol usab ang drayber nga si Sherwin Dorico, 45, ug nangapangos ug nabun-og sila si Crizalde Camacho, 38, Joey Jamboy, 46, Nestor Pepito, Melito Puyos ug Yulo Tibon, 60. Matud ni Agua gikan gihapon sa dakbayan sa Sugbo ang mga biktima ug pag-abot sa lugar nisiyagit ang drayber nga nawad-an sila og preno. Gidudahang naratol si Brigole ug nilayat apan naligsan sa luyo nga ligid.
Ang mga biktima padayon pa nga giatiman sa Balamban District Hospital. (BANAT NEWS)