CEBU, Philippines — Nasikop ang 11 ka tawo sa managlahing operasyon sa ilegal nga drugas sa Calamba ug Pasil, Dakbayan sa Sugbo kagahapon.
Kadlawon nagpahigayon og checkpoint ang kapolisan sa dalan A. Lopez, Calamba diin pito ang nadakpan.
Ang mga dinakpan giila nga sila si Khenny Wowie Osmeña, 39, ug Ringo Navarro Reyes, 44, kinsa pulos high-value target, Elmer Pobe Piloton, 38; Geimar Angobong Oliverio, 32; Ray Gonzales, 38; Riczen Cuizon Balame, 29, ug Kie Tayona, 21, pulos residente sa naasoy’ng lugar.
Ang mga dinakpan nakuhaan og mokabat sa P243,080 nga balor sa shabu.
Si Osmeña kusganong nihimakak nga siya ang nanag-iya sa mga gipasangil kanila sa kapolisan ug nitataw nga igo ra siyang gipaangkon sa mga gibutang nga ebidensya.
Samtang sa Sitio Lawis, Pasil naatlan sa kapolisan ang 64-anyos nga babaye nga namaligya og shabu sa ilang panimalay nga si Evangeline Oyao.
Lakip nga nadakpan ang anak niini nga si Jhon Lyster Oyao, 22, kinsa gikatahong kunsabo niya ug ang laing duha mao sila si Glenn Aying, 42, ug Juscar Laraño, 31, kinsa gituohang bag-ohay lang nakapalit sa maong tigpamaligya.
Mokabat sa P99,928 ang balor sa mga nasakmit nga shabu gikan sa mga dinakpan.
Kanhi surrenderer si Evangeline apan giingong nibalik kini sa pagpamaligya ug iyang giangkon nga usa na siya ka semana nibalik sa pagpamaligya og shabu nga gikan ra sa Ermita.
Si Evangeline nipadayag nga siya ang gisaligan sa pinansiyal sa iyang mga nangaminyo na nga mga anak ug mga apo hinungdan nga nakahuna-huna siya sa pagpamaligya og shabu.
“Naay silingan nga way lingaw ba maoy nanawag ani nilang polis. Di gyud unta ko mahibaw-an. Naa lang gyuy traydor nga silingan,” matud ni Evangeline.
Samtang tulo ka tawo ang nasikop sa mga sakop sa City Drug Enforcement Unit ug City Intelligence Branch sa managlahi nga lugar sa Dakbayan sa Sugbo.
Ang duha kinsa nalambigit kang anhing Rowen Secretaria alyas Yawa ang nasikop sa may Sitio Lawis, Pasil alas 2 sa hapon niadtong Huwebes.
Ang nasikop mao sila si Arnel Gernale, 26, taga Ermita Proper, high value target ug nasikop na sa PDEA apan na-dismis ang kaso, ug Romy Ramas kinsa napriso na sa Mandaue City Jail ug ang kapuyo niini nga si Maris Loga, 24-anyos.
Nasakmit gikan sa mga dinakpan ang shabu nga mokabat sa P189 mil.
Sa ikaduhang operasyon, usa ka lalaki ang nasikop sa may General Gines Street, Sawang Calero pasado alas 2 sa hapon niadtong Huwebes.
Ang nasikop naila nga si Kevin Paypa, 25, kinsa nasakmitan og 23 ka gagmay nga putos sa shabu nga balor og dul-an sa P47 mil. (BANAT NEWS)