CEBU, Philippines - Patay ang 26-anyos nga babaye human kini gitigbas sa iyang maguwang didto sa Sitio Capilyahan, Barangay Santican, Danao City niadtong Lunes sa kaadlawon.
Ang biktima giila nga si Eugine Mag-aso Pasay, molupyo sa maong lugar. Base sa imbestigasyon, gitigbas kini sa iyang maguwang gamit ang sundang didto sa ilang balay samtang kini natulog.
Ang suspek mao si Joselito Mag-aso Pasay, 40, kinsa ni-surrender sa Danao Police Station human sa krimen.
Dala niini ang 15 pulgada nga sundang nga gigamit sa pagpatay. Nakaangkon ang biktima ug tinigbasan dapit sa iyang tiyan ug dughan nga maoy hinungdan sa kamatayon niini.
Gi-imbestigahan pa sa kapolisan kung unsa gyud ang motibo sa pagpanigbas sa suspek didto sa iyang igsoon. Rhena E. Pizarra (BANAT NEWS)