CEBU, Philippines - Nangayo og tabang sa Office of the Ombudsman si Busay Barangay Captain Amilo Lopez aron pag-ila kun kinsa angay manubag sa pagpublikar sa iyang ngalan nga siya nagpositibo sa drug test nga gihimo sa Cebu City Office for Substance Abuse Prevention (COSAP) sa miaging tuig.
Niadtong adlaw’ng Miyerkules dihang nagpadala og suwat sa Ombudsman ang Kapitan kay buot niyang mahibawo kun si Cebu City Mayor Tomas Osmeña o si Dr. Alice Utlang ang pangulo sa COSAP maoy nipahibawo sa mga tigbalita nga siya nag-positibo.
Matud ni Lopez atol sa drug test sa maong adlaw usab siya nasayod nga positibo siya sa drug test dayon duna’y mitawag kaniya nga reporter aron pagpangayo sa iyang komento kalabot niini.
Dihang gipangutana ang kapitan kun ngano karon lang kini niya gibuhat ang pagdangop sa Ombudsman siya miingon nga nangunsulta pa sa iyang mga kaila kun unsa’y angay buhaton kay hangtod karon dako gihapon kaayo og epekto kaniya ilabi na sa iyang pamilya ang maong hitabo.
Niadtong buwan sa Disyembre nakakuha og kopya sa resulta sa confirmatory test si Lopez ug negatibo siya. Si Utlang sa iyang bahin miingon nga sila sa COSAP wala manabi nga siya positibo apan andam niya kining tubagon kun makadawat na siya og suwat gikan sa Ombudsman. Gisuwayan og kuha sa iyang habig si Mayor Tomas Osmeña mahitungod sa maong lakang sa kapitan pinaagi sa text message apan wala pa siya motubag hangtud ning pagsulat sa balita. (BANAT NEWS)